Eron Quvaytdagi AQSh nishonlariga hujum qildi
AQSh Eronning bir qator harbiy obyektlariga zarba berdi, Tehron esa mintaqadagi AQSh nishonlariga javob hujumlarini amalga oshirdi.
AQSh va Eron o‘rtasidagi harbiy qarama-qarshilik yangi hujumlar fonida yanada keskinlashdi. AQSh Markaziy qo‘mondonligi Eron hududidagi bir qator harbiy nishonlarga navbatdagi zarbalar berilganini ma’lum qildi.
Qo‘mondonlikning bildirishicha, besh soat davom etgan operatsiya davomida Bushehr, Chobahor, Jask, Konarak, Abu Musa va Bandar Abbosdagi harbiy obyektlar nishonga olingan.
AQSh prezidenti Donald Tramp ushbu amaliyotni izohlar ekan, Eronning hujumkor salohiyatini yo‘q qilish davom ettirilishini ta’kidlagan.
“Biz ularga juda jiddiy zarbalar bermoqdamiz. Bu davom etadi, keyin vaziyatni baholaymiz”, — degan Tramp.
Shu bilan birga, BAA rasmiylari Eron Hormuz bo‘g‘ozida harakatlanayotgan ikkita kemaga raketa uchirgani haqida ma’lum qilgan. Mazkur hodisa yuzasidan Eron tomoni hozircha rasmiy izoh bermagan.
Press TV esa AQShning so‘nggi hujumlariga javoban Eron harbiylari Quvaytdagi AQSh harbiy obyektlariga dron zarbalari berganini ma’lum qilgan. Telekanal xabariga ko‘ra, hujumlar harbiy aloqa tizimlari, yoqilg‘i omborlari, Patriot havo mudofaasi tizimlari, boshqaruv minorasi va o‘q-dorilar omborlarini nishonga olgan.
Shuningdek, Eron harbiy-dengiz kuchlari AQSh kemalaridan biriga qanotli raketa bilan zarba bergani ham da’vo qilingan
