IIV “Ravshan Zolotoy” bo‘yicha Interpol qidiruvi nega to‘xtatilganiga izoh berdi
Vazirlikka ko‘ra, tergov davomida ilgari surilgan boshqa ayblovlar o‘z tasdig‘ini topmagani sabab unga nisbatan tergov harakatlari to‘xtatilgan.
Ichki ishlar vazirligi Toshkent shahri IIBB boshlig‘i o‘rinbosari Dilmurod Mirsodiqov “Ravshan Zolotoy” nomi bilan tanilgan Ravshan Muhitdinovga nisbatan Interpol orqali e’lon qilingan xalqaro qidiruvning nega bekor qilinganiga izoh berdi. Bu haqda Gazeta.uz xabar berdi.
14-iyul kuni bo‘lib o‘tgan matbuot anjumanida Mirsodiqovning ma’lum qilishicha, Ravshan Muhitdinovga nisbatan jinoyat ishi 2021-yilda qo‘zg‘atilgan va unga tegishli moddalar bo‘yicha qidiruv e’lon qilingan.
Uning so‘zlariga ko‘ra, vaqt o‘tishi bilan javobgarlikka tortish va protsessual muddatlar tugagani sababli jinoyat ishi to‘xtatilgan hamda ishning bir qismi tugatilgan.
Shundan so‘ng tergov davomida qo‘shimcha arizalar va yangi ma’lumotlar kelib tushgani bois tergov harakatlari qayta tiklangan. Biroq barcha tergov tadbirlari yakunida Muhitdinovga nisbatan ilgari surilgan boshqa ayblovlar o‘z tasdig‘ini topmagan.
“Barcha tergov harakatlari o‘tkazilgandan so‘ng unga nisbatan qo‘yilgan boshqa ayblovlar va holatlar o‘z tasdig‘ini topmadi. Unga nisbatan tergov harakatlari yana to‘xtatildi”, — dedi Dilmurod Mirsodiqov.
Iyun oyi boshida Ravshan Muhitdinovning Interpol saytida joylashtirilgan Red Notice (“qizil bildirishnoma”) kartochkasi qidiruvdagi shaxslar bazasidan olib tashlangan. Avvalroq u O‘zbekiston huquqni muhofaza qiluvchi organlari tomonidan Jinoyat kodeksining mulkka zarar yetkazish, uyushgan qurolli guruh tuzish yoki unda ishtirok etish hamda bezorilikka oid moddalari bilan xalqaro qidiruvga berilgani ma’lum qilingandi.
Ravshan Muhitdinov esa Facebook’dagi sahifasida 19 yillik quvg‘indan so‘ng unga qo‘yilgan barcha ayblovlar bekor qilingani va O‘zbekistonga qaytish imkoniyati yaratilganini yozdi.
Ma’lumotlarga ko‘ra, Ravshan Muhitdinov ayni paytda Turkiyada yashaydi va tadbirkorlik bilan shug‘ullanadi. Shuningdek, u Istanbulda ro‘yxatdan o‘tgan Dünya Engelliler Vakfı (DEV) tashkilotida moliyaviy masalalar bo‘yicha vitse-prezident lavozimida faoliyat yuritadi.
