O‘zbekistonda 5 778 ta mahallada birorta ham jinoyat sodir etilmadi
Yil boshidan buyon 5 mingdan ortiq qidiruvdagi shaxs ushlanib, 2 633 nafar bedarak yo‘qolgan shaxs topilgan.
2026-yilning dastlabki olti oyida O‘zbekistondagi 5 778 ta mahallada birorta ham jinoyat sodir etilmagan. Bu mamlakatdagi jami mahallalarning 64 foizini tashkil etgan. Shu bilan birga, jinoyat qayd etilgan mahallalarning 2 738 tasi (30,4 foiz) “sariq”, 476 tasi (5,3 foiz) esa “qizil” toifaga kiritilgan. Bu haqda Ichki ishlar vaziri o‘rinbosari Ramazon Ashropov ma’lum qildi.
Hisobot davrida Ichki ishlar organlariga 200 mingdan ortiq murojaat kelib tushgan. Ko‘rib chiqilgan murojaatlarning 87 foizi bo‘yicha fuqarolarning talab va murojaatlari qanoatlantirilgan.
Shuningdek, olti oy davomida 2 633 nafar bedarak yo‘qolgan shaxs topilib, oila a’zolari bag‘riga qaytarildi hamda turli noxush holatlarning oldi olindi.
Tezkor-qidiruv tadbirlari natijasida tergov va sud organlaridan yashiringan 5 010 nafar shaxs qo‘lga olinib, ularga nisbatan jazo muqarrarligi ta’minlangan.
