O‘zbekistonda elektr energiyasi iste’moli bo‘yicha yangi rekord qayd etildi
Anomal issiq fonida respublika bo‘yicha sutkalik elektr energiyasi iste’moli o‘tgan yilgi yozgi rekorddan yuqori ko‘rsatkichni qayd etdi.
O‘zbekistonda 13-iyul kuni yozgi elektr energiyasi iste’moli bo‘yicha yangi rekord qayd etildi.
Energetika vazirligi ma’lum qilishicha, jazirama havo sharoitida respublika bo‘yicha sutkalik elektr energiyasi iste’moli 278,6 million kVt/soatni tashkil etdi. Bu o‘tgan yozgi mavsumdagi eng yuqori ko‘rsatkichdan 6 million kVt/soatga yoki 2,2 foizga ko‘p.
Avvalgi yozgi rekord 2025-yil 18-iyul kuni qayd etilgan bo‘lib, o‘shanda sutkalik iste’mol 272,6 million kVt/soatni tashkil etgan edi.
Shuningdek, 13-iyul kuni mamlakatda 281,5 million kVt/soat elektr energiyasi ishlab chiqarildi.
Vazirlikning qayd etishicha, havo haroratining yanada oshishi fonida yaqin kunlarda elektr energiyasi iste’moli va tizim yuklamasi bo‘yicha yangi rekordlar qayd etilishi mumkin.
Shu munosabat bilan energetika korxonalari kuchaytirilgan ish rejimiga o‘tgan. Hududlarda maxsus avariya-ta’mirlash brigadalari elektr tarmoqlarida yuzaga kelishi mumkin bo‘lgan nosozliklarni tezkor bartaraf etish bo‘yicha navbatchilik asosida faoliyat yuritmoqda.
Energetika vazirligi ayrim hududlarda texnik nosozliklar sabab elektr ta’minotida vaqtinchalik uzilishlar kuzatilishi mumkinligini bildirib, fuqarolarni, ayniqsa eng yuqori yuklama soatlarida, zarur bo‘lmagan elektr jihozlarini o‘chirib, elektr energiyasidan oqilona va tejamkor foydalanishga chaqirdi.
