Qashqadaryoda 3 kishida quturish kasali aniqlandimi?
Ijtimoiy tarmoqda tarqalgan xabarlar yuzasidan SSV munosabat bildirdi.
Qashqadaryo viloyati Sog‘liqni saqlash boshqarmasi ijtimoiy tarmoqlarda Kitob tumani “Varganza” mahallasida bir oilaning uch nafar a’zosida quturish kasalligi aniqlangani haqida tarqalgan xabarlar yuzasidan rasmiy ma’lumot berdi.
Ma’lum qilinishicha, joriy yil 10-iyul kuni Kitob tumanida yashovchi 1979-yilda tug‘ilgan fuqaro xavfli yuqumli kasallik gumoni bilan shifoxonaga yotqizilgan. Epidemiologik surishtiruv davomida fuqaro taxminan bir oy avval tulki bolasi tomonidan tirnalgani aniqlangan. U 11-iyul kuni vafot etgan.
Hozirda marhumning o‘lim sababini aniqlash maqsadida sud-tibbiy ekspertiza tayinlangan.
Shuningdek, marhum bilan aloqada bo‘lgan uch nafar fuqaro ehtiyot chorasi sifatida tibbiy ko‘rikdan o‘tkazilgan. Tekshiruvlar davomida ularda quturish kasalligining klinik belgilari aniqlanmagan. Ayni paytda ular shifokorlar nazoratiga olinib, zarur profilaktik emlash tadbirlari o‘tkazilmoqda.
Qayd etilishicha, Kitob tumanidagi epidemiologik vaziyat viloyat Sog‘liqni saqlash boshqarmasi, Sanitariya-epidemiologik osoyishtalik va jamoat salomatligi xizmati hamda veterinariya mutaxassislari hamkorligida to‘liq nazoratga olingan.
Mutasaddilar fuqarolardan ortiqcha xavotirga berilmaslikni hamda ijtimoiy tarmoqlarda asossiz va tasdiqlanmagan ma’lumotlarni tarqatmaslikni so‘radi.
