“Real Sanjik” ishi bo‘yicha apellyatsiya shikoyati ko‘rib chiqilmoqda
Toshkent shahar sudi apellyatsiya jarayoni davom etayotgani va advokatning shikoyati yuzasidan rasmiy izoh berdi.
Firibgarlik va boshqa jinoyatlarni sodir etishda aybdor deb topilgan S. Karimov (“Real Sanjik”)ga oid jinoyat ishi Toshkent shahar sudining jinoyat ishlari bo‘yicha sudlov hay’ati apellyatsiya instansiyasida ko‘rib chiqilmoqda.
Toshkent shahar sudlari matbuot xizmatining ma’lum qilishicha, ayrim ommaviy axborot vositalarida sudlanuvchi himoyachilaridan biri tomonidan apellyatsiya shikoyati qabul qilinmagani va shu sabab sud majlisi asossiz qoldirilayotgani haqida tarqalgan xabarlar haqiqatga to‘g‘ri kelmaydi.
Aniqlanishicha, advokat apellyatsiya shikoyatini avval aytilganidek 18-may kuni emas, balki 30-iyun kuni tuman sudiga elektron shaklda taqdim etgan. Shikoyat berish muddati o‘tgan bo‘lsa-da, hukm hali qonuniy kuchga kirmagani hamda ish boshqa himoyachilar tomonidan o‘z vaqtida berilgan apellyatsiya shikoyatlari asosida ko‘rib chiqilayotgani inobatga olinib, advokatning muddatni tiklash haqidagi iltimosnomasi qanoatlantirilgan.
Natijada advokat O. Ashurov boshqa himoyachilar qatori bugungi sud majlisida ishtirok etgan.
Toshkent shahar sudi matbuot xizmati odil sudlovni amalga oshirishda advokatlarning o‘rni muhim ekanini ta’kidlab, ommaviy axborot vositalari orqali shaxsiy huquqiy pozitsiyani aniq tasdiqlangan fakt sifatida talqin qilish jamoatchilikni chalg‘itishi mumkinligini qayd etdi.
Mazkur jinoyat ishi bo‘yicha navbatdagi sud majlisi 20-iyul kuni davom ettiriladi.
