Anomal issiqda ko‘chatlarni qachon sug‘orish kerak?
To‘g‘ri sug‘orish tartibi o‘simliklarni issiq stressidan himoya qilib, namlikni uzoqroq saqlashga yordam beradi.
Mutaxassislar anomal issiq kunlarda ko‘chat va o‘simliklarni kechki hamda tungi vaqtda sug‘orishni tavsiya qilmoqda.
Ekologiya va iqlim o'zgarishi qo'mitasining qayd etishicha, daraxt va buta ko‘chatlarini to‘g‘ri vaqtda sug‘orish ularni issiq stressidan himoya qiladi, tuproqdagi namlikni saqlaydi hamda sog‘lom o‘sishini ta’minlaydi.
Eng maqbul sug‘orish vaqti kechki soat 20:00 dan ertalab soat 05:00 gacha hisoblanadi. Bu davrda havo salqin bo‘lgani sababli suv kamroq bug‘lanadi va ildizlarga yaxshiroq singadi.
Mutaxassislar tavsiyasiga ko‘ra:
-
Yangi ekilgan ko‘chatlar soat 20:00–22:00 oralig‘ida kamroq, ammo tez-tez sug‘orilishi kerak.
-
Yosh daraxtlar haftasiga 2–3 marta chuqur va mo‘l sug‘oriladi.
-
Katta daraxtlar esa haftasiga 1–2 marta, kechki yoki tungi vaqtda chuqur sug‘orilishi tavsiya etiladi.
Shuningdek, suvni barglarga emas, ildiz zonasiga yo‘naltirish, uni sekin quyish, tuproq namligini saqlash uchun mulchadan foydalanish tavsiya etiladi.
Mutaxassislar soat 10:00 dan 17:00 gacha ko‘chatlarni sug‘ormaslikni tavsiya qilmoqda. Chunki bu vaqtda suv tez bug‘lanib, o‘simliklarga zarar yetkazishi mumkin.
Eslatib o‘tilishicha, har bir o‘simlik va tuproq turi turlicha namlik talab qiladi. Shu sababli sug‘orishdan avval tuproq namligini tekshirish va o‘simlik ehtiyojidan kelib chiqib ish tutish maqsadga muvofiq hisoblanadi.
