Belarusdagi hibsxonada o‘zbekistonlik ayol farzandli bo‘ldi
Ayolning iltimosiga ko‘ra, uning yangi tug‘ilgan farzandi O‘zbekistondagi yaqinlari qaramog‘iga topshirildi.
Belarusdagi tergov hibsxonasida tug‘ilgan o‘zbekistonlik chaqaloq O‘zbekistonga olib kelindi. Bu haqda Oliy Majlisning Inson huquqlari bo‘yicha vakili (Ombudsman) axborot berdi.
Ma’lum qilinishicha, joriy yil 15-may kuni O‘zbekiston delegatsiyasi Ombudsman tashabbusi bilan Belarusning Minsk shahridagi tergov hibsxonasida saqlanayotgan O‘zbekiston fuqarolari bilan uchrashuv o‘tkazgan.
Uchrashuv davomida muassasada saqlanayotgan homilador O‘zbekiston fuqarosi tergov hibsxonasi sharoitida farzandini to‘liq parvarish qilish imkoniyati cheklanganini bildirib, chaqaloq tug‘ilgach uni O‘zbekistondagi yaqin qarindoshlari qaramog‘iga topshirishda amaliy yordam so‘ragan.
Mazkur murojaat nazoratga olinib, farzand dunyoga kelganidan so‘ng O‘zbekistonning Belarus Respublikasidagi diplomatik vakolatxonasi, tegishli davlat organlari hamda MDH Inson huquqlari bo‘yicha komissiyasi hamkorligida zarur huquqiy va konsullik tartib-taomillari amalga oshirilgan.
Natijada chaqaloqni O‘zbekistonga qaytarish uchun barcha zarur hujjatlar rasmiylashtirildi. Joriy yil iyul oyida chaqaloq yaqin qarindoshlari qaramog‘iga topshirilib, O‘zbekistonga olib kelindi.
