Buxorodagi ko‘p qavatli uyda yuz bergan yong‘in ichidan 3 kishi qutqarildi
Yong‘inning qo‘shni xonadonlarga tarqalish xavfi sabab 7 nafar qo‘shni fuqaro xavfsiz hududga evakuatsiya qilingan.
Buxoro viloyatining Kogon shahrida joylashgan ko‘p qavatli uylardan birida yuz bergan yong‘in oqibatida 3 nafar fuqaro qutqarildi. Bu haqda Favqulodda vaziyatlar vazirligi matbuot xizmati xabar berdi.
Ma’lum qilinishicha, 15-iyul kuni soat 03:38 da 112 yagona dispetcherlik xizmatiga Kogon shahri Turon ko‘chasidagi ko‘p qavatli uy xonadonlaridan birida yong‘in sodir bo‘lgani haqida xabar kelib tushgan.
Voqea joyiga zudlik bilan yetib borgan FVV qutqaruv bo‘linmalari yong‘inni soat 03:46 da qurshab olgan va soat 04:40 da to‘liq bartaraf etgan.
Qutqaruv ishlari davomida yong‘in sodir bo‘lgan xonadondan 3 nafar fuqaro sog‘-salomat olib chiqilgan. Shuningdek, yong‘inning qo‘shni xonadonlarga tarqalish xavfi sabab 7 nafar qo‘shni fuqaro xavfsiz hududga evakuatsiya qilingan.
Yong‘in oqibatida xonadonning taxminan 50 kvadrat metr maydonida pol qismi, devorlar va ayrim uy jihozlari zararlangan. Qutqaruvchilarning tezkor harakatlari natijasida 650 kvadrat metrga yaqin maydon hamda qo‘shni uy-joylar yong‘indan saqlab qolingan.
Hodisa oqibatida tan jarohati olganlar qayd etilmagan. Hozirda yong‘inning kelib chiqish sabablari hamda yetkazilgan moddiy zarar miqdori aniqlanmoqda.
