Ellikqalʼada voyaga yetmagan shaxs otasining mashinasida avariyaga uchrab, boshqa mashinaga 79 mln zarar yetkazdi
Yetkazilgan zarar uning otasining ish haqi hisobidan MIB orqali jabrlanuvchiga undirib berilgan.
Voyaga yetmagan G.b. otasiga tegishli “NEXIA” rusumli avtotransport vositasini Ellikqalʼa tumani, “Guldursin” OFY hududidagi “Qizilqalʼa-Buston-Guldursin-To‘rtko‘l” avto yo‘lida boshqarib kelayotib, o‘ziga qarama-qarshi harakatlanib kelayotgan “MALIBU” rusumli avtomashina bilan to‘qnashib, yuz bergan avtohalokat natijasida ushbu avtomashinaga 79 839 000 so‘m moddiy zarar yetkazgan.
Yetkazilgan zararlarni voyaga yetmagan G.B.ning otasi V.B.dan undirish haqida Jinoyat ishlari bo‘yicha Ellikqalʼa tuman sudi tomonidan hukm chiqarilgan.
Ushbu hukmga asosan chiqarilgan ijro varaqa Majburiy ijro byurosi Ellikqalʼa tuman bo‘limi ish yurituviga kelib tushgan va bo‘lim davlat ijrochilari tomonidan ijro harakatlariga kirishilgan.
Xususan, qarzdorning chetga chiqish huquqi cheklanib, uning nomidagi avtomashinaga taqiq o‘rnatilgan hamda qo‘shimchasiga qarzdorning ish haqiga undiruv qaratilgan.
Shuning natijasida, yetkazilgan 79 mln so‘mdan ortiq jinoiy zararlar to‘lig‘i bilan undirilib, sud qarori ijrosi taʼminlangan.
