“Endi mening uyim yo‘q” — Janubiy Koreya prezidenti
Li Chje Myon ko‘chmas mulk bozorini qo‘llab-quvvatlash maqsadida yagona uyini sotib, endi shaxsiy uy-joyi yo‘qligini bildirdi.
Janubiy Koreya prezidenti Li Chje Myon o‘ziga tegishli yagona kvartirani sotganini va endi shaxsiy uy-joyi yo‘qligini ma’lum qildi. Bu haqda u hukumatning uy-joy siyosatiga bag‘ishlangan yig‘ilishda bayonot berdi.
Yonhap xabariga ko‘ra, prezident ushbu kvartirani joriy yilning fevral oyida sotuvga qo‘ygan. Ko‘chmas mulk Seul yaqinidagi Seongnam shahrida joylashgan bo‘lib, bitim hukumatning uy-joy bozorini barqarorlashtirish siyosati doirasida amalga oshirilgan.
Prezident administratsiyasi dastlabki oldi-sotdi shartnomasi imzolanganini tasdiqlagan. Li Chje Myon va uning turmush o‘rtog‘i Kim Xe Gyong mazkur kvartiraga birgalikda egalik qilgan. Hozirda ular Seulning Xannam-dong tumanidagi rasmiy prezident qarorgohida istiqomat qilmoqda.
Janubiy Koreya hukumati ko‘chmas mulk bozoridagi spekulyatsiyalarni kamaytirish hamda uy-joy narxlarini barqarorlashtirish maqsadida foydalanilmayotgan turar joylarni sotishni rag‘batlantirmoqda. Rasmiylar bunday choralar mavjud uy-joy fondini ko‘paytirish va narxlarning sun’iy oshishining oldini olishga xizmat qilishini ta’kidlamoqda.
