Eronning sobiq prezidenti Mossad bilan aloqalari uchun hibsga olindi — NYT
Mahmud Ahmadinejodning idorasi esa barcha ayblovlarni inkor etdi.
The New York Times nashri Eronning sobiq prezidenti Mahmud Ahmadinejod Isroilning Mossad razvedka xizmati bilan aloqalarda bo‘lgani gumoni bilan Eron Islom inqilobi qo‘riqchilari korpusi (IRGC) tomonidan uy qamog‘iga olingani haqida maqola e'lon qildi.
Nashrning AQSH, Isroil va Eron rasmiy doiralaridagi anonim manbalarga tayanib yozishicha, Mossad bir necha yil davomida Ahmadinejodni o‘z tomoniga og‘dirishga uringan hamda Eronda hokimiyat almashgan taqdirda uni mamlakatning yangi rahbarlaridan biri sifatida ko‘rgan.
Tergovda aytilishicha, ushbu maxfiy operatsiya doirasida Ahmadinejod xorijda Mossad vakillari bilan bir necha bor uchrashgan. Xususan, Budapeshtda o‘sha paytdagi Mossad rahbari David Barnea bilan uchrashuv o‘tkazilgani, Isroil tomoni uning safarlari va yashashi bilan bog‘liq xarajatlarni moliyalashtirgani da'vo qilingan.
Maqolada yana fevral oyida Tehronda sobiq prezident qarorgohiga berilgan zarbalardan so‘ng Ahmadinejod Mossad tomonidan xavfsiz joyga olib chiqilgani, biroq keyinchalik noma'lum sabablar bilan u yerni tark etgani va shundan so‘ng IRGC tomonidan uy qamog‘iga olingani iddao qilinadi.
Biroq Mahmud Ahmadinejodning idorasi ushbu ma'lumotlarning barchasini keskin rad etdi. Rasmiy bayonotda The New York Times'ning xabari "mutlaqo yolg‘on", "to‘qib chiqarilgan" va "jamoatchilikni chalg‘itishga qaratilgan" deb baholandi. Shuningdek, sobiq prezident uy qamog‘ida ekani haqidagi xabar ham inkor etildi.
Hozircha Eron hukumati Ahmadinejodning hibsga olingani yoki uy qamog‘iga joylashtirilgani yuzasidan rasmiy tasdiq bermagan. Shu sababli NYT keltirgan ma'lumotlar mustaqil manbalar tomonidan to‘liq tasdiqlanmagan.
