Farg‘onada qariyb 1 mlrd so‘mlik dori va tamaki yoqib yuborildi
Maʼlum bo‘lishicha, inson salomatligi uchun zararli va sifatsiz deb topilgan.
Farg‘ona viloyatida inson salomatligiga xavf tug‘dirishi mumkin bo‘lgan katta miqdordagi dori vositalari va tamaki mahsulotlari qonun talablari asosida yo‘q qilindi.
Majburiy ijro byurosi Farg‘ona shahar bo‘limi tomonidan O‘zbekiston Respublikasi Vazirlar Mahkamasining 2009 yil 15 iyuldagi 200-son qarori talablariga muvofiq, Toshloq tumanidagi chiqindi poligoni hududida davlat daromadiga o‘tkazilgan ashyoviy dalillarni yo‘q qilish ishlari amalga oshirilgan.
Ijro harakatlari davomida umumiy qiymati 638 million so‘mlik 23 ta ijro hujjati bo‘yicha dori vositalari hamda 335 million 916 ming so‘mlik 14 ta ijro hujjati bo‘yicha tamaki mahsulotlari belgilangan tartibda yo‘q qilindi.
Bu bilan jami 37 ta ijro hujjati bo‘yicha talablar to‘liq taʼminlanib, ijro harakatlari amalda yakunlandi.
