Infantinoning FIFA prezidentligi xavf ostida
UEFA tarkibidagi qator federatsiyalar Janni Infantinoga qarshi nomzod topish ustida ishlamoqda, biroq FIFA prezidenti hali ham navbatdagi saylov favoritlaridan biri bo‘lib qolmoqda.
FIFA prezidenti Janni Infantino 2027-yilda bo‘lib o‘tadigan tashkilot prezidentligi saylovlarida uchinchi muddat uchun nomzodini ilgari surishini ma'lum qilgan bo‘lsa-da, Yevropa futbolida unga qarshi yagona nomzod tayinlash bo‘yicha harakatlar kuchaymoqda. Bu haqda talkSPORT xabar berdi.
Nashr ma'lumotiga ko‘ra, UEFAga a'zo bir qator milliy federatsiyalar Infantinoning so‘nggi qarorlari, xususan, 2026-yilgi Jahon chempionati vaqtida yuzaga kelgan bahsli holatlar va FIFA boshqaruvi uslubidan norozi. Shu sabab ular saylovda amaldagi prezidentga jiddiy raqobatchi topishga urinmoqda.
Nomzodlar orasida birinchi bo‘lib UEFA prezidenti Aleksander Cheferin tilga olinmoqda. Biroq u hozircha UEFAdagi faoliyatini davom ettirishni afzal ko‘rayotgani va FIFA prezidentligi uchun kurashishni rejalashtirmayotgani aytilmoqda.
Yana bir ehtimoliy nomzod sifatida PSJ prezidenti va Yevropa klublari assotsiatsiyasi (ECA) rahbari Nosir Al-Xelayfiy ko‘rsatilmoqda. Biroq manbalarga ko‘ra, u ham FIFA prezidenti bo‘lish niyatida emas.
Agar yuqoridagi ikki nomzod saylovda qatnashmasa, UEFA doiralari Varshavaning "Legiya" klubi prezidenti Daryush Mioduski nomzodini ilgari surishi mumkin. Uning nomzodi Belgiya, Polsha va yana bir qator federatsiyalar tomonidan qo‘llab-quvvatlanayotgani aytilmoqda.
Shuningdek, kelajakda FIFA prezidentligiga da'vogar bo‘lishi mumkin bo‘lgan shaxslar qatorida KONKAKAF prezidenti Viktor Montagliani hamda Afrika futbol konfederatsiyasi (CAF) prezidenti Patris Motsepe ham tilga olinmoqda. Ammo talkSPORT ma'lumotiga ko‘ra, ularning hech biri 2027-yilgi saylovda Infantinoga qarshi kurashishi kutilmayapti.
Shunga qaramay, ekspertlar Infantinoning imkoniyatlari hanuz yuqori ekanini qayd etmoqda. So‘nggi yillarda u Jahon chempionati ishtirokchilari sonini kengaytirish, FIFA Klublar o‘rtasidagi jahon chempionatini isloh qilish kabi tashabbuslari orqali Afrika (CAF), Osiyo (AFC) va KONKAKAF konfederatsiyalarining keng qo‘llab-quvvatloviga ega bo‘lgan. Bu esa UEFA tashabbusining muvaffaqiyat qozonishini qiyinlashtirishi mumkin.
FIFA nizomiga ko‘ra, prezidentlikka nomzodlarni ko‘rsatish muddati 2027-yil 18-noyabrda yakunlanadi. Saylov ham aynan shu kuni Marokashning Rabot shahrida bo‘lib o‘tadigan FIFA Kongressi doirasida o‘tkaziladi.
