Ish haqi kechiktirilsa, xodimga kompensatsiya to‘lanadi
Bu mehnat munosabatlarini soddalashtirish, ularni raqamlashtirish va xodimlar huquqlarini kuchaytirishni nazarda tutuvchi qonun loyihasida belgilandi.
Oliy Majlis Qonunchilik palatasi deputatlari mehnat munosabatlarini takomillashtirishga qaratilgan qonun loyihasini qabul qilib, Senatga yubordi. Hujjat mehnat munosabatlarini rasmiylashtirishni soddalashtirish, ortiqcha byurokratik to‘siqlarni kamaytirish hamda xodimlarning huquqlarini kuchaytirishni nazarda tutadi.
Qonun loyihasiga ko‘ra, ishga qabul qilishda talab etiladigan hujjatlar ro‘yxati qisqartiriladi. Endilikda fuqaroni ishga qabul qilishda asosan uning shaxsiy identifikatsiya raqami (JShShIR) talab etiladi. Harbiy xizmatga majburlar va chaqiriluvchilar esa harbiy guvohnoma yoki harbiy hisobda turganlik haqidagi hujjatni taqdim etadi.
Shuningdek, mehnat munosabatlarini raqamlashtirish doirasida elektron raqamli imzo yoki biometrik identifikatsiya (Face ID) orqali tasdiqlangan hujjatlar yuridik kuchi jihatidan qo‘lda imzolangan hujjatlarga tenglashtiriladi.
Loyihada mehnat jarayonida tazyiq va zo‘ravonlikka qarshi kurashishga oid normalar ham belgilangan. Unga ko‘ra, bunday holatlarning oldini olish, ularni taqiqlash hamda jabrlangan xodimlarni himoya qilish choralari mustahkamlanmoqda.
Bundan tashqari, ish beruvchi ish haqini belgilangan muddatda to‘lamagan taqdirda, har bir kechiktirilgan kun uchun xodimga pulli kompensatsiya to‘lash tartibi aniqlashtirilmoqda.
Qonun loyihasi deputatlar tomonidan qabul qilinib, ko‘rib chiqish uchun Senatga yuborildi.
