Jazirama sabab Qashqadaryoda ham yuk mashinalari harakati cheklanadi
Cheklov avtomobil yo‘llari qoplamasini saqlash va ularning muddatidan oldin shikastlanishining oldini olish maqsadida joriy etildi.
Qashqadaryo viloyatida jazirama ob-havo sabab og‘ir yuk avtomobillari harakatiga vaqtinchalik cheklov joriy etildi.
Viloyat hokimligining ma’lum qilishicha, havo harorati kunduzi 42–44°C, ayrim hududlarda esa undan ham yuqori darajaga ko‘tarilmoqda. Bunday sharoitda asfaltbeton qoplamasi harorati 70–75°C gacha yetib, yo‘llarning yuk ko‘tarish qobiliyati pasayadi. Natijada og‘ir yuk transporti harakati yo‘l qoplamasida deformatsiyalar va boshqa texnik nuqsonlarni keltirib chiqarishi mumkin.
Shu munosabat bilan Qarshi shahri, tuman markazlari hamda ularni bog‘lovchi umumiy foydalanishdagi avtomobil yo‘llarida og‘ir yuk avtomobillarining harakati har kuni soat 09:00 dan 19:00 gacha vaqtincha cheklanadi.
Mas’ullar haydovchilar hamda yuk tashuvchi korxonalardan mazkur cheklovlarga qat’iy amal qilishni va yuk tashish vaqtlarini belgilangan tartib asosida rejalashtirishni so‘radi.
Qayd etilishicha, ushbu chora yo‘l infratuzilmasini asrash, harakat xavfsizligini ta’minlash hamda avtomobil yo‘llarining xizmat muddatini uzaytirishga xizmat qiladi.
