Namanganda 27 yoshli fuqaro cho‘kib ketdi
Hozirda Sirdaryo daryosida cho‘kib ketgan fuqaroni qidiruv ishlari olib borilmoqda.
Namangan viloyatida Sirdaryo daryosida cho‘kib ketgan fuqaro qidirilmoqda. Bu haqda Namangan viloyati Favqulodda vaziyatlar boshqarmasi Axborot xizmati ma’lum qildi.
Qayd etilishicha, 12-iyul kuni soat 18:26 da 112 qisqa raqamiga Namangan tumanining "Oq yer" mahallasi hududidan oqib o‘tuvchi Sirdaryo daryosida fuqaro cho‘kib ketgani haqida murojaat kelib tushgan.
Dastlabki ma’lumotlarga ko‘ra, Farg‘ona viloyati Uchko‘prik tumani "Puchug‘oy" mahallasida yashovchi, 1999-yilda tug‘ilgan fuqaro cho‘milish vaqtida ehtiyotsizlik oqibatida suvga cho‘kib ketgan.
Hodisa yuzasidan Namangan viloyati Favqulodda vaziyatlar boshqarmasi Maxsus qidiruv-qutqaruv otryadi g‘avvoslari tomonidan suv ostida, Namangan tumani Favqulodda vaziyatlar bo‘limi qutqaruvchilari tomonidan esa suv yuzasida uzluksiz qidiruv ishlari olib borilmoqda.
Favqulodda vaziyatlar boshqarmasi qidiruv ishlari yakunlari bo‘yicha qo‘shimcha ma’lumot berilishini ma’lum qilgan.
