Namanganda noqonuniy qurilmalar buzib tashlanmoqda
Xususan, Yangi Namangan tumanida 7 nafar fuqaroning tegishli ruxsatnomasiz qurilgan qurilmasi MIB tomonidan buzildi.
Yangi Namangan tumanida sud qarorining ijrosini taʼminlash maqsadida Majburiy ijro byurosi tomonidan qonunchilik talablari asosida majburiy ijro harakatlari amalga oshirilmoqda.
Xususan, Yangi Namangan tumani "Mustaqillikning 5 yilligi" mahallasi hududida masʼuliyati cheklangan jamiyatga tegishli yer maydonida 7 nafar fuqaro tomonidan tegishli ruxsatnomalarsiz uy-joylar qurilganligi yuzasidan sudga daʼvo arizasi kiritilgan.
Fuqarolik ishlari bo‘yicha sud tomonidan ish atroflicha ko‘rib chiqilib, noqonuniy qurilmalarni buzdirish haqida qaror qabul qilingan. Ushbu sud hujjati qonuniy kuchga kirgach, ijro hujjatlari Majburiy ijro byurosi Yangi Namangan tuman bo‘limiga yuborilgan.
Ijro ishi qo‘zg‘atilganidan so‘ng qarzdorlarga sud qarorini ixtiyoriy ravishda belgilangan muddatda bajarish uchun imkoniyat yaratilgan.
Biroq ixtiyoriy ijro muddati davomida sud qarorining talablari bajarilmaganligi sababli davlat ijrochilari tomonidan qonunchilikda belgilangan tartibda majburiy ijro harakatlariga kirishilgan.
Bugungi kunda olib borilayotgan ijro tadbirlari davomida sud qarorining ijrosini taʼminlash maqsadida noqonuniy qurilmalarni buzdirish ishlari amalga oshirilmoqda.
