O‘zbekiston AI-95 benzini narxi bo‘yicha Markaziy Osiyoda birinchi o‘rinda
Biroq uning narxi hali ham jahon o‘rtacha ko‘rsatkichidan 8,7 foiz past.
O‘zbekistonda AI-95 markali benzin narxi Markaziy Osiyo davlatlari orasida eng yuqori ko‘rsatkichni qayd etdi.
Ranking.kz nashri GlobalPetrolPrices platformasining 2026-yil 6-iyul holatiga oid ma’lumotlariga tayanib xabar berishicha, O‘zbekistonda AI-95 benzinining bir litri 1,342 AQSH dollarini tashkil etmoqda. Bu Markaziy Osiyo mamlakatlari orasidagi eng yuqori narx hisoblanadi.
Taqqoslash uchun, AI-95 benzinining bir litri:
-
Qirg‘izistonda — 1,016 dollar,
-
Qozog‘istonda — 0,687 dollar,
-
Turkmanistonda — 0,428 dollarni tashkil etadi.
Shuningdek, mazkur yoqilg‘i narxi Rossiyada 0,943 dollar, AQSHda 1,094 dollar, Xitoyda esa 1,136 dollar etib qayd etilgan.
Shu bilan birga, O‘zbekistonda AI-95 benzini mintaqadagi eng qimmat bo‘lishiga qaramay, uning narxi jahon o‘rtacha ko‘rsatkichidan 8,7 foiz past. Hozirda dunyo bo‘yicha AI-95 benzinining o‘rtacha narxi 1,47 AQSH dollarini tashkil etadi.
Tadqiqotga ko‘ra, dunyoda eng arzon AI-95 benzini Liviya (0,023 dollar/litr), Eron (0,029 dollar/litr) va Venesuelada (0,035 dollar/litr) sotilmoqda.
Eng qimmat AI-95 benzini esa Gonkongda qayd etilgan bo‘lib, u yerda bir litr yoqilg‘i 4,06 AQSH dollaridan sotilmoqda. Shuningdek, Malavi, Daniya, Isroil, Niderlandiya va Finlyandiya ham benzin narxi eng yuqori bo‘lgan davlatlar qatoridan joy olgan.
