Toshkentda qariyb 3,2 kilogramm giyohvandlik vositalari musodara qilindi
Tezkor tadbirlar davomida geroin, gashish, opiy va mefedron musodara qilinib, bir necha shaxs qo‘lga olingan.
Toshkent shahrida qariyb 3,2 kilogramm giyohvandlik vositalari noqonuniy muomaladan chiqarildi. Bu haqda Davlat xavfsizlik xizmati xabar berdi.
Ma’lum qilinishicha, Bektemir tumanida harakatlanayotgan "Gentra" rusumli avtomobil to‘xtatilib tekshirilgan. Unda Yashnobod tumanida yashovchi, 1998-yilda tug‘ilgan ikki nafar fuqaro ketayotgani aniqlangan. Avtomobil salonidan bir nechta zip-paketlarga qadoqlangan kukunsimon moddalar topilgan.
Tezkor tadbir davom ettirilib, gumonlanuvchilar yashirib qo‘ygan xufiya joy hamda ijaraga olingan xonadon ko‘zdan kechirilgan. U yerdan ham kukunsimon moddalar, elektron tarozilar va giyohvandlik vositalarini qadoqlashda foydalanilgan buyumlar aniqlangan.
Ekspertiza xulosasiga ko‘ra, musodara qilingan moddalar 1,2 kilogramm geroin va 100 gramm mefedron ekani tasdiqlangan. Aniqlanishicha, ushbu ikki fuqaro avval ham giyohvandlik vositalari bilan bog‘liq jinoyatlar uchun sudlangan.
Ikkinchi holatda esa Shayxontohur tumanida yashovchi, 1982-yilda tug‘ilgan, muqaddam sudlangan fuqaroning xonadonidan 47 gramm gashish va 34 gramm opiy topilgan.
Tezkor tadbir davomida uni giyohvandlik vositalari bilan ta’minlab kelgan Olmazor tumanida yashovchi 1980 va 1985-yillarda tug‘ilgan ikki nafar fuqaro ham qo‘lga olingan. Ularning avtomobillari va yashash manzillari ko‘zdan kechirilganda 1,8 kilogramm gashish hamda 12 gramm opiy musodara qilingan.
Hozirda har ikki holat yuzasidan gumonlanuvchilarga nisbatan jinoyat ishlari qo‘zg‘atilib, tergov harakatlari olib borilmoqda.
