Zangiotada ko‘p qavatli binodan o‘zini tashlamoqchi bo‘lgan fuqaro qutqarib qolindi
Fuqaroning ruhiy-asab kasalliklari dispanserida ro‘yxatda turishi aniqlanib, uni ixtisoslashtirilgan tibbiy muassasaga yuborish choralari ko‘rilgan.
Toshkent viloyatining Zangiota tumanida ko‘p qavatli savdo majmuasi tomidan o‘zini tashlamoqchi bo‘lgan 36 yoshli fuqaro IIB xodimlarini tomonidan qutqarib qolindi. Bu haqda IIBB matbuot kotibi xabar berdi.
Ijtimoiy tarmoqlarda fuqaroning ko‘p qavatli binodan o‘zini tashlamoqchi bo‘lgani aks etgan videolar tarqaldi.
Ma’lum qilinishicha, hodisa 14-iyul kuni soat 22:20 atrofida Toshkent viloyatining Zangiota tumanidagi ko‘p qavatli savdo majmuasining 10-qavatida sodir bo‘lgan.
Voqea joyiga tuman Ichki ishlar bo‘limi, prokuratura hamda Favqulodda vaziyatlar bo‘limi xodimlari yetib borib, fuqaroni savdo majmuasining 10-qavatidan sog‘-salomat va jarohatlarsiz olib tushgan.
Aniqlanishicha, fuqaro Qashqadaryo viloyati Chiroqchi tumani “Chambil” mahallasida yashovchi, 36 yoshli Y.Y. bo‘lib, u ruhiy-asab kasalliklari dispanserida ro‘yxatda turadi.
Holat yuzasidan tegishli hujjatlar rasmiylashtirilgan va fuqaroni ixtisoslashtirilgan tibbiy muassasaga yuborish choralari ko‘rilgan.
