Afg‘oniston vazirligi O‘zbekiston haqidagi bahsli bayonotlarni rad etdi — TIV

Ayrim ommaviy axborot vositalarida Afg‘onistonning fazilatlarni targ‘ib qilish va yomonliklarning oldini olish vaziri Xolid Hanafi Paktia viloyatiga safari chog‘ida O‘zbekistonning Samarqand, Buxoro va Termiz shaharlarida Islom faqat nomigagina qolganini aytgani haqida xabar tarqalgan edi. 

 

Mazkur xabarlar ortidan O‘zbekistonning Afg‘onistondagi elchixonasi holatni o‘rganib chiqdi. Bu haqda O‘zbekiston TIV matbuot xizmati xabar berdi.

 

Elchixona ma’lum qilishicha, 16 iyul kuni Kobuldagi diplomatik vakolatxonaga Afg‘onistonning Fazilatlarni targ‘ib qilish va yomonliklarning oldini olish vazirligidan rasmiy rad etish xati kelib tushgan. Unda ayrim doiralar va ommaviy axborot vositalari ikki qardosh davlat o‘rtasidagi ishonch va yaxshi qo‘shnichilik munosabatlariga putur yetkazish maqsadida faktlarni buzib talqin qilayotgani bildirilgan. 

 

Bayonotda O‘zbekiston islom olamining ko‘plab buyuk allomalari, jumladan Imom Buxoriyning vatani ekani qayd etilib, Afg‘oniston va O‘zbekistonni chuqur diniy, tarixiy, madaniy hamda xalqlar o‘rtasidagi mushtarak rishtalar bog‘lab turishi ta’kidlangan. 

 

Shuningdek, O‘zbekiston haqida salbiy mazmunda talqin qilingan bayonotlar haqiqatga mutlaqo to‘g‘ri kelmasligi, bunday da’volar qat’iyan rad etilishi va ular faktlarni buzib ko‘rsatish ekani qayd etilgan. 

 

Vazirlik Afg‘oniston va O‘zbekiston o‘rtasidagi birodarlik, o‘zaro hurmat va yaxshi qo‘shnichilik munosabatlari bundan buyon ham mustahkamlanishiga ishonch bildirgan.