Donald Tramp jinsiy zo‘ravonlik va tuhmat ishi bo‘yicha 5 million dollar tovon puli to‘ladi
Trampning apellyatsiya doirasidagi e’tirozlari rad etilib, sud qarori bilan yozuvchi va jurnalist Elizabet Kerrollning yuridik firmasiga mablag‘ o‘tkazildi.
Donald Tramp yozuvchi va jurnalist Elizabet Jin Kerrollga nisbatan jinsiy zo‘ravonlik va tuhmat ishi bo‘yicha sud qaroriga muvofiq 5 million dollardan ortiq tovon pulini to‘ladi. Bu haqda Reuters agentligi xabar berdi.
Ma’lum qilinishicha, Trampning apellyatsiya jarayonlari doirasidagi e’tirozlariga qaramay, federal sudya sud nazoratidagi hisobvaraqdan mablag‘ni Kerrollning yuridik firmasiga o‘tkazishga ruxsat bergan.
Eslatib o‘tamiz, 2023-yilda sud hay’ati Trampni Elizabet Jin Kerrollga nisbatan jinsiy zo‘ravonlik va tuhmat bo‘yicha fuqarolik ishida javobgar deb topib, 5 million dollar tovon to‘lashga hukm qilgan edi. Biroq sud Trampni zo‘rlash aybi bo‘yicha javobgar deb topmagan.
Keyinchalik Kerroll Trampga qarshi boshqa fuqarolik da’volarida ham g‘alaba qozongan. Natijada uning foydasiga chiqarilgan sud qarorlarining umumiy qiymati 88,3 million dollarni tashkil etgan.
Donald Tramp barcha ayblovlarni rad etib, Kerrollning da’volarini asossiz va siyosiy tusdagi huquqiy bosim deb baholagan. U yozuvchini tanimasligini, ayblovlar esa kitob savdosini oshirish maqsadida o‘ylab topilganini ta’kidlab kelmoqda.
Elizabet Jin Kerroll esa olgan mablag‘ni avval pensiya jamg‘armasiga yo‘naltirish, keyinchalik uning bir qismini xayriya ishlari uchun sarflashni rejalashtirayotganini ma’lum qilgan.
