Endilikda fuqarolar o‘z nomiga rasmiylashtirilgan bank kartalari va telefon raqamlarini onlayn boshqara oladi
My.gov.uz portalida bank kartalarini bloklash, foydalanilmayotgan SIM-kartalarni o‘chirish va pullik xizmatlarni tekshirish imkoniyati yaratiladi.
O‘zbekistonda 2026-yil 1-oktyabrdan Yagona interaktiv davlat xizmatlari portali — my.gov.uz orqali ko‘rsatiladigan xizmatlar soni kengaytiriladi. Bu haqda Adliya vazirligi xabar berdi.
Qabul qilingan qarorga muvofiq, fuqarolar va yuridik shaxslar portal orqali o‘z nomiga rasmiylashtirilgan telefon raqamlari va bank kartalari haqida ma’lumot olish, shuningdek ularni boshqarish imkoniyatiga ega bo‘ladi.
Yangi xizmatlar doirasida fuqarolar:
-
o‘z nomiga rasmiylashtirilgan va foydalanilayotgan telefon raqamlari hamda bank kartalari to‘g‘risida ma’lumot olishi;
-
telefon raqamini ma’lum muddatga vaqtincha nofaol holatga o‘tkazish yoki qayta faollashtirish;
-
foydalanmayotgan SIM-kartalarga xizmat ko‘rsatishni to‘xtatish bo‘yicha ariza yuborishi;
-
telefon raqamiga ulangan pullik xizmatlar haqida ma’lumot olishi;
-
bank kartalarini bloklash (yopish) yuzasidan emitent bankka elektron ariza yuborishi mumkin bo‘ladi.
Bundan tashqari, portal orqali fuqarolarga o‘z nomiga yangi notarial harakat rasmiylashtirilgani haqida avtomatik xabarnoma yuboriladi hamda ushbu ma’lumotlarning elektron hisobi yuritiladi.
Shuningdek, jismoniy va yuridik shaxslar my.gov.uz orqali o‘zlariga tegishli ko‘chmas mulk va avtotransport vositalarini garov yoki ipotekaga qo‘yish, ularni begonalashtirishni taqiqlash yoki mazkur taqiqni bekor qilish bo‘yicha ham murojaat yuborish imkoniyatiga ega bo‘ladi.
