Eng faol 200 ta mahallaga 2 milliard so‘mdan mukofot beriladi

 

Prezident Shavkat Mirziyoyev raisligida o‘tkazilgan videoselektor yig‘ilishida mahallalar budjetini mustahkamlashga qaratilgan yangi tashabbuslar e’lon qilindi.

 

Qayd etilishicha, joriy yilda mahallalar budjetida 600 milliard so‘m mablag‘ qolishi rejalashtirilgan edi.

 

Xususan, iyun oyidagi Prezident farmoniga muvofiq, mahallalarda qoladigan yer va mol-mulk solig‘i ulushi 10 foizdan 15 foizga oshirilgan. Shuningdek, sanitariya qoidalarini buzish hamda noqonuniy qurilish uchun undiriladigan jarimalarning 10 foizi ham mahalla budjetiga yo‘naltiriladi.

 

Bundan tashqari, maydoni 5 ming kvadrat metrgacha bo‘lgan bo‘sh binolarni mahallalarning o‘zi sotuvga chiqarishiga ruxsat berildi. Bu hisobiga mahallalar budjetiga qo‘shimcha 405 milliard so‘m tushishi kutilmoqda.

 

Yangi tartibga ko‘ra, mahalla hududidagi noturar obyektlardan tushadigan yer va mol-mulk solig‘ining yana 5 foizi ham mahallaning o‘zida qoladi. Natijada mahallalar ixtiyorida har yili qo‘shimcha 400 milliard so‘m mablag‘ shakllanadi.

 

Shuningdek, yil yakunida eng ko‘p tadbirkorlarni ro‘yxatdan o‘tkazgan, eng ko‘p yangi ish o‘rni yaratgan, soliq tushumi yuqori bo‘lgan hamda eng ko‘p qo‘shimcha soliq bazasi shakllantirgan 200 ta mahallaga 2 milliard so‘mdan mukofot beriladi.

 

Umuman olganda, yangi tashabbuslar natijasida mahallalar budjetiga tushum joriy yilda 1 trillion 600 milliard so‘mga, kelgusi yildan boshlab esa 2 trillion so‘mga yetkazilishi rejalashtirilgan.