“Grin karta” oluvchilar uchun 100 ming dollargacha garov puli talabi joriy etilishi mumkin

 

AQSh ma’muriyati ayrim mamlakatlar fuqarolaridan “yashil karta” (doimiy yashash guvohnomasi) olish jarayonida moliyaviy kafolat sifatida taxminan 100 ming AQSh dollari miqdorida garov puli talab qilish imkoniyatini ko‘rib chiqmoqda. Bu haqda The Wall Street Journal nashri manbalariga tayanib xabar berdi.

 

Nashr ma’lumotiga ko‘ra, depozit miqdori har bir arizachining holatiga qarab o‘zgarishi mumkin. Ayrim hollarda u 100 ming dollardan kam yoki undan ko‘p bo‘lishi ehtimoldan xoli emas.

 

Qayd etilishicha, AQSh Davlat departamenti mazkur tizimni dastlab cheklangan miqdordagi davlatlarda sinov tariqasida joriy etishni taklif qilgan. Biroq ushbu mamlakatlar ro‘yxati ochiqlanmagan.

 

Manbalarga ko‘ra, garov puli AQSh uchun moliyaviy kafolat vazifasini bajaradi. Ya’ni, mamlakatga ko‘chib o‘tgan shaxs o‘zini moddiy jihatdan ta’minlay olmasa, ushbu mablag‘dan foydalanish mumkin bo‘ladi.

 

Davlat departamenti vakili Tommi Pigottning ta’kidlashicha, Donald Tramp AQShga immigratsiya qilmoqchi bo‘lgan shaxslar moliyaviy jihatdan o‘zini o‘zi ta’minlay olishi kerakligini bir necha bor ta’kidlagan.

 

Rejaga ko‘ra, AQShning xorijdagi konsulliklari orqali “yashil karta”ga murojaat qilgan ayrim talabgorlar depozit qo‘yishlari shart bo‘ladi. Mazkur mablag‘ AQSh fuqaroligi olinganidan so‘ng qaytarilishi mumkin. The Wall Street Journal yozishicha, fuqarolikni olish jarayoni odatda kamida besh yil davom etadi.

 

Hozircha ushbu taklif rasman joriy etilgani e’lon qilinmagan.