Mahalla raislariga yerlarni auksionga chiqarish vakolati beriladi
Prezident qaroriga ko‘ra, mahalla raislari xususiy bog‘cha, maktab, klinika va sport inshootlari qurish uchun yerlarni auksionga chiqarish vakolatiga ega bo‘ladi.
Prezident Shavkat Mirziyoyev raisligida mahallalarga yangi muhit olib kirish hamda “mahalla yettiligi” faoliyatini yangicha tashkil etishga bag‘ishlangan videoselektor yig‘ilishi boshlandi.
Yig‘ilishda Farg‘ona viloyatidagi Yangi Quva mahallasi misolida aholini ish bilan ta’minlash va daromadini oshirishning yangi mexanizmlari taqdim etildi.
Qayd etilishicha, mazkur mahallada 51 nafar ishsiz fuqaro mavjud bo‘lib, ulardan to‘rt nafari agrotexnikumni tamomlagan va 10 sotixdan tomorqa yeriga ega. Yangi tartibga ko‘ra, mahalla raisi tomorqada gul ko‘chati yetishtirishga ixtisoslashgan yengil konstruksiyali issiqxona qurish uchun mahalla bankiriga buyurtma beradi.
Shuningdek, mahalla raisi ishsiz fuqarolarning ehtiyojini o‘rganib, kim tadbirkorlik bilan shug‘ullanishni istashi, qaysi oilaga daromadini oshirish uchun kredit, uskuna yoki yer zarurligini aniqlaydi va bu bo‘yicha mahalla bankiriga aniq vazifalar yuklaydi.
Yig‘ilishda mahallalarda ijtimoiy infratuzilmani rivojlantirish masalasiga ham alohida e’tibor qaratildi. Xususan, Yangi Quva mahallasida bog‘cha yetishmasligi sababli 50 nafar bola qo‘shni mahalladagi ta’lim muassasasiga qatnayotgani, hududda esa 70 sotix bo‘sh yer mavjudligi qayd etildi.
Shu munosabat bilan endilikda mahallalarda xususiy bog‘cha, maktab, klinika va sport inshootlari qurilishi uchun yer uchastkalarini auksionga chiqarish vakolati mahalla raislariga berilishi ma’lum qilindi.
