Mahallalardagi sustkashlik uchun 152 nafar rahbar ishdan olindi
Prezident yig‘ilishida 960 ta kambag‘al oila yashaydigan 32 ta mahallada birorta ham ehtiyojmand fuqaro doimiy ish bilan ta’minlanmagani tanqid qilindi.
Prezident Shavkat Mirziyoyev raisligida mahallalarga yangi muhit olib kirish hamda “mahalla yettiligi” faoliyatini yangicha tashkil etishga bag‘ishlangan videoselektor yig‘ilishida kambag‘allikni qisqartirish borasidagi ishlar tanqidiy tahlil qilindi.
Qayd etilishicha, ayrim hududlarda amalga oshirilayotgan loyihalarda kambag‘al oilalar ishtiroki 15 foizga ham yetmayapti. Xususan, Qorao‘zak, Marhamat, Mirishkor, Nurobod va Termiz tumanlaridagi sustkashliklar misol sifatida ko‘rsatib o‘tildi.
Yig‘ilishda 960 ta kambag‘al oila yashaydigan 32 ta mahallada birorta ham ehtiyojmand fuqaro doimiy ish bilan ta’minlanmagani alohida tanqid qilindi. Shuningdek, 883 ta mahallada bankirlar xonadonbay yurib loyiha ishlab chiqmagani va tadbirkorlar bilan uchrashmagani qayd etildi.
Shu munosabat bilan yil boshidan buyon mahallalarda ishlarni samarali tashkil etmagan 152 nafar rahbar lavozimidan ozod etilgan, yana 700 nafar mas’ulga nisbatan intizomiy choralar qo‘llanilgan.
Yig‘ilishda mahallalarda soliq tushumlarini oshirish, jinoyatchilikning oldini olish hamda aholi muammolarini hal etish masalalari ham muhokama qilindi.
Prezident Shavkat Mirziyoyev mahalla odamlar uchun “ishonch, tayanch va imkoniyatlar markazi” bo‘lishi zarurligini ta’kidladi.
