"Qo‘qon patiri" geografik ko‘rsatkich sifatida davlat ro‘yxatidan o‘tkazildi
Bu mahsulot sifati va gastronomik brendini himoya qilishga xizmat qiladi.
Adliya vazirligida Farg‘ona viloyatining milliy gastronomik merosi sanalgan "Qo‘qon patiri" geografik ko‘rsatkich sifatida davlat ro‘yxatidan o‘tkazildi.
Qo‘qon azaldan hunarmandchilik, savdo va milliy pazandachilik rivojlangan yirik madaniy markazlardan biri hisoblanadi. Mazkur hududga xos bo‘lgan "Qo‘qon patiri" o‘zining betakror ta’mi, an’anaviy retsepti hamda tayyorlash texnologiyasi bilan ajralib turadi.
Ushbu non turi o‘ziga xos tayyorlash usuli tufayli bir necha hafta davomida sifati va ta’mini saqlab qolishi bilan mashhur.
"Qo‘qon patiri"ning geografik ko‘rsatkich sifatida davlat ro‘yxatidan o‘tkazilishi mahsulot nomi hamda uni tayyorlashning an’anaviy texnologiyasini huquqiy jihatdan himoya qilish, sifat standartlarini mustahkamlash va Farg‘ona viloyatining gastronomik brendini xalqaro miqyosda keng targ‘ib etishga xizmat qiladi.
Ma’lumot uchun, geografik ko‘rsatkich — mahsulotning muayyan hududga mansubligini hamda uning sifati, obro‘si va o‘ziga xos xususiyatlari aynan shu hududning tabiiy-iqlimiy va ijtimoiy-madaniy omillari bilan chambarchas bog‘liqligini tasdiqlovchi intellektual mulk obyektidir.
