Toshkentda Afrikadan yuborilgan kokain aniqlandi
Shuningdek, Bo‘stonliqda 17 ming 600 tup ko‘knori hamda 9 tup kannabis o‘simliklarini noqonuniy ravishda ekib parvarishlayotgan shaxs qo'lga olindi.
Toshkent va Bo‘stonliqda yirik miqdordagi giyohvandlik vositalari hamda taqiqlangan o‘simliklar aniqlandi. Bu haqda DXX xabar berdi.
Ma’lum qilinishicha, Syerra-Leone Respublikasidan yuborilgan kuryerlik jo‘natmasini Toshkent shahrining Yakkasaroy tumanidagi xususiy kuryerlik punktidan qabul qilib olayotgan Yashnobod tumanida yashovchi, 1983-yilda tug‘ilgan, muqaddam sudlangan fuqaro qo‘lga olingan.
Jo‘natma tekshirilganda avtoehtiyot qismlari ichiga yashirilgan 728 gramm kokain borligi aniqlangan. Shuningdek, gumonlanuvchining yashash xonadonidan zip paketlarga joylangan kukunsimon moddalar hamda tarkibida giyohvandlik vositalari bo‘lgan shirinliklar ashyoviy dalil sifatida olingan.
Mazkur holat yuzasidan fuqaro Jinoyat kodeksining 246-moddasi 2-qismi bilan javobgarlikka tortilib, jinoyat ishi qo‘zg‘atilgan. Hozirda tergov harakatlari olib borilmoqda.
Yana bir tezkor tadbir davomida DXX va Ichki ishlar organlari xodimlari Toshkent viloyatining Bo‘stonliq tumanida 1971-yilda tug‘ilgan fuqaroning taqiqlangan giyohvandlik o‘simliklarini noqonuniy ravishda ekib parvarishlayotganini aniqlangan.
Gilavasoy qishlog‘i yaqinidagi tog‘ yonbag‘irlarida o‘tkazilgan ko‘zdan kechirish jarayonida 17 ming 600 tup ko‘knori hamda 9 tup kannabis o‘simligi topilgan. Shuningdek, gumonlanuvchining yashash xonadonidan quritilgan ko‘knori boshoqlari va maydalangan holda saqlanayotgan ko‘knori mahsulotlari ham aniqlangan.
Mazkur holat yuzasidan unga nisbatan Jinoyat kodeksining 270-moddasi 2-qismi “v” bandi hamda 25, 273-moddasi 6-qismi “a” bandi bilan jinoyat ishi qo‘zg‘atilib, tergov harakatlari davom ettirilmoqda.
