XDP pullik avtoturargohlar uchun jarima joriy etilishiga qarshi chiqdi
Partiya pullik avtoturargoh uchun to‘lovni amalga oshirmagan haydovchilarga ma’muriy jarima qo‘llash tashabbusi Konstitutsiya va amaldagi qonunchilikka zid ekanini bildirdi.
O‘zbekiston Xalq demokratik partiyasi (XDP) Toshkent shahar hokimligi tomonidan jamoatchilik muhokamasiga qo‘yilgan, pullik avtomobil to‘xtash joylari uchun to‘lovni amalga oshirmagan haydovchilarga ma’muriy jarima belgilashni nazarda tutuvchi qonun loyihasiga rasmiy munosabat bildirdi.
Partiya bayonotida qayd etilishicha, mazkur tashabbusni amaldagi qonunchilik nuqtayi nazaridan qabul qilib bo‘lmaydi.
XDPning ta’kidlashicha, birinchi navbatda, O‘zbekiston Respublikasi Konstitutsiyasining 98-moddasiga muvofiq, Toshkent shahar hokimligi qonunchilik tashabbusi huquqiga ega subyektlar qatoriga kirmaydi. Shu sababli kodekslarga o‘zgartirish kiritishni nazarda tutuvchi qonun loyihalarini hokimlik tashabbusi bilan ilgari surish Konstitutsiya talablariga mos kelmaydi.
Partiya, shuningdek, pullik avtoturargoh xizmatidan foydalanganlik uchun haq to‘lash haydovchi va xizmat ko‘rsatuvchi operator o‘rtasidagi fuqarolik-huquqiy munosabat ekanini eslatdi. Fuqarolik kodeksiga ko‘ra, bunday qarzdorlik yuzaga kelganda uni ma’muriy jarima orqali emas, balki qonunchilikda belgilangan tartibda, jumladan sud orqali undirish kerakligi ta’kidlandi.
Bayonotda ma’muriy javobgarlik davlat tomonidan faqat jamoat va davlat manfaatlarini himoya qilish uchun qo‘llanishi lozimligi qayd etilib, xususiy operator daromadini ta’minlash maqsadida davlatning majburlov mexanizmlaridan foydalanish huquqiy davlat tamoyillariga zid ekani bildirildi.
XDP yana bir masalaga ham e’tibor qaratdi. Partiya Toshkent shahar hokimligining pullik avtoturargohlardan foydalanayotgan haydovchilarning atigi 2–3 foizi to‘lovni amalga oshirayotgani haqidagi bayonoti jamoatchilikda shubha uyg‘otayotganini qayd etdi. Chunki, partiya fikricha, hozirgacha pullik avtoturargohlardan tushayotgan mablag‘lar va ularning davlat budjetiga o‘tkazilishi bo‘yicha ochiq statistik ma’lumotlar e’lon qilinmagan.
Shu munosabat bilan XDP ijro hokimiyati organlarini yangi jarimalar joriy etishga emas, balki fuqarolar uchun qulay va sifatli infratuzilma yaratish, mavjud xizmatlar shaffofligini ta’minlash hamda aholi manfaatlarini ustuvor qo‘yishga chaqirdi.
Eslatib o‘tamiz, Toshkent shahar hokimligi avvalroq pullik avtoturargoh uchun belgilangan to‘lovni amalga oshirmagan haydovchilarga Bazaviy hisoblash miqdorining 0,3 baravari miqdorida ma’muriy jarima belgilashni taklif qilgan edi. Mazkur loyiha hozirda jamoatchilik muhokamasidan o‘tmoqda.
