Alimentdan qarzdor ota makkajo‘xori dalasidan topildi
Maʼlumotlarga ko‘ra, qarzdor fuqaro hozirgi kunga qadar 37 million so‘m aliment pullarini to‘lamasdan qochib yurgan.
Toshkent viloyatining Bekobod tumanida aliment to‘lashdan bo‘yin tovlab, MIB xodimlaridan yashirinib yurgan erkak dala ichida bekinib o‘tirganida qo‘lga tushdi. Bu haqida MIB axborot xizmati Zamon.uz'ga maʼlum qildi.
Maʼlumotlarga ko‘ra, qarzdor erkakka bundan 3 oy muqaddam qidiruv eʼlon qilingan bo‘lib, uning uyiga davlat ijrochilari bir necha bor kelib ketishgan, biroq fuqaro bu manzilda emasligi haqida maʼlumot olingan.
Shunga qaramasdan davlat ijrochisi uni qidirish yo‘lida yangi maʼlumotlarga ega bo‘ladi va qochoq ota aynan o‘z uyida, yana ham aniqrog‘i makkajo‘xori dalasida yashirinib o‘tirgani maʼlum bo‘ladi.
Sud buyrug‘iga ko‘ra, qarzdor fuqarodan undiruvchi foydasiga ikki nafar voyaga yetmagan farzandlari taʼminoti uchun xar oyda barcha daromadlarining uchdan bir qismi miqdorida aliment undirish to‘g‘risidagi ijro hujjati kelib tushgan bo‘lib, tegishli ijro ishi qo‘zg‘atilgan.
Ushbu ijro hujjati yuzasidan qarzdor fuqaro bir necha bor ogohlantirishlarga qaramasdan aliment pullarini to‘lamaganligi uchun Jinoyat ishlari bo‘yicha Bekobod tuman sudining 16 yanvardagi qaroriga asosan qarzdorga nisbatan 15 sutka maʼmuriy qamoq jazosi tayinlangan.
Qarzdor fuqaro hozirgi kunga qadar 37 million so‘m aliment pullarini to‘lamasdan qochib yurgan. Hozirda JKning 122-moddasiga asosan jinoiy ish qo‘zg‘atish uchun to‘plangan hujjatlar sudga yuborilgan.
