AQSh xorijiy talabalar va jurnalistlar vizasi muddatini qisqartiradi
Yangi tartib Federal reyestrda e’lon qilinganidan 60 kun o‘tib kuchga kirishi mumkin.
AQSh xorijiy talabalar, jurnalistlar hamda madaniy almashinuv dasturlari ishtirokchilari uchun viza berish tartibini o‘zgartirishni rejalashtirmoqda. Bu haqda Reuters AQSh Ichki xavfsizlik departamenti hujjatlariga tayanib xabar berdi.
Ma’lum qilinishicha, yangi tartibga ko‘ra F toifasidagi talaba vizalari va J toifasidagi madaniy almashinuv vizalarining amal qilish muddati to‘rt yilgacha etib belgilanadi.
Shuningdek, I toifasidagi jurnalistlar vizasining amal qilish muddati 240 kungacha, Xitoy fuqarolari uchun esa 90 kungacha etib cheklanadi. Hozirda xorijiy OAV vakillariga odatda bir necha yil muddatga viza beriladi.
Amaldagi tartibga ko‘ra, mazkur vizalar odatda o‘qish, mehnat yoki almashinuv dasturining davomiyligi asosida rasmiylashtiriladi.
Reuters’ning qayd etishicha, yangi qoida Federal reyestrda e’lon qilinganidan 60 kun o‘tib kuchga kirishi rejalashtirilgan. Hujjat, shuningdek, Kongress tomonidan ko‘rib chiqilishi kerak.
