Buxoro va Qoraqalpog‘istonda noqonuniy dori savdosiga chek qo‘yildi
Yashirin sexda qalbaki dori tayyorlagan shaxs, yana bir tadbirkor esa dori vositalarini 5 600 dollarga sotayotgan vaqtida ushlandi.
Buxoro viloyati hamda Qoraqalpog‘iston Respublikasida o‘tkazilgan tezkor tadbirlar davomida qalbaki va noqonuniy muomaladagi katta miqdordagi dori vositalari aniqlandi. Bu haqda Davlat xavfsizlik xizmati ma’lum qildi.
Ma’lum qilinishicha, DXXning Buxoro viloyati bo‘yicha boshqarmasi hamda Iqtisodiy jinoyatlarga qarshi kurashish departamenti xodimlari hamkorligida G‘ijduvon tumanida yashovchi tadbirkorga tegishli dorixona, yashash xonadoni va avtomashinasi ko‘zdan kechirilgan.
Tekshiruv davomida tadbirkor o‘z uyida yashirin sex tashkil etib, dori vositalarining yorliq va yo‘riqnomalarini o‘zgartirish orqali qalbaki dori vositalari tayyorlagani aniqlangan.
Tezkor tadbirda 111 turdagi 25 716 dona dori vositasi, shuningdek, bo‘sh qutilar, yorliqlar, yo‘riqnomalar va boshqa vositalar ashyoviy dalil sifatida rasmiylashtirib olingan.
“Farmatsevtika mahsulotlari xavfsizligi markazi” davlat muassasasi xulosasiga ko‘ra, aniqlangan dorilarning 30 turi davlat reyestrida qayd etilmagan, 50 turiga esa muvofiqlik sertifikati rasmiylashtirilmagan.
Yana bir tezkor tadbirda G‘ijduvon tumanida farmatsevtika faoliyati bilan shug‘ullanuvchi MCHJ rahbari davlat reyestrida qayd etilmagan va sifat sertifikatiga ega bo‘lmagan 16 dona “Oktagam” dori vositasini 5 600 AQSH dollariga sotayotgan vaqtida qo‘lga olingan.
Shuningdek, unga tegishli dorixonadan 109 turdagi 32 094 dona sifat sertifikatisiz dori vositalari hujjatlashtirib olingan.
Qoraqalpog‘iston Respublikasida esa DXX va bojxona organlari hamkorligida o‘tkazilgan tezkor tadbir davomida Nukus tumanida yashovchi 1989-yilda tug‘ilgan fuqaro o‘z xonadonida noqonuniy dori ombori tashkil etgani aniqlangan.
Uning yashash manzilidan 65 turdagi 12 958 dona dori vositasi, shuningdek, ularni qadoqlash uchun mo‘ljallangan 2 410 dona shtrix-kod va etiketka ashyoviy dalil sifatida musodara qilingan.
Mutaxassislar xulosasiga ko‘ra, ushbu dori vositalari belgilangan saqlash talablariga rioya qilinmagan holda saqlangan bo‘lib, 16 turdagi preparatning yaroqlilik muddati o‘tgan.
Hozirda barcha holatlar yuzasidan jinoyat ishlari qo‘zg‘atilib, tergov harakatlari olib borilmoqda.
