Jazirama sabab Toshkentda minglab iste’molchilar elektrsiz qoldi
Olmazor, Chilonzor, Yunusobod, Sergeli va boshqa tumanlarda jami 8 250 iste’molchining elektr ta’minoti uzildi.
Havo haroratining keskin ko‘tarilishi hamda elektr tarmoqlariga tushayotgan yuklamaning ortishi sababli Toshkent shahri va Toshkent viloyatining ayrim hududlarida elektr ta’minotida vaqtinchalik uzilishlar kuzatildi.
Energetika vazirligi ma’lumotiga ko‘ra, soat 14:30 holatiga Toshkent shahri va viloyatidagi ayrim elektr uzatish tarmoqlari hamda podstansiyalarda texnik nosozliklar yuzaga kelgan.
Shu sababli Olmazor, Yakkasaroy, Chilonzor, Yunusobod, Yashnobod, Mirzo Ulug‘bek, Sergeli va Zangiota tumanlaridagi jami 8 250 nafar iste’molchining elektr ta’minoti vaqtincha uzilgan.
Hozirda maxsus avariya brigadalari tomonidan nosozliklarni bartaraf etish va iste’molchilarni elektr energiyasi bilan qayta ta’minlash ishlari olib borilmoqda.
Energetika mutasaddilari yuzaga kelgan noqulayliklar uchun iste’molchilardan uzr so‘radi.
Shuningdek, elektr ta’minotidagi rejali va favqulodda uzilishlar bo‘yicha ma’lumotlar tuman elektr ta’minoti korxonalari hamda Toshkent shahar va Toshkent viloyati hokimliklarining rasmiy Telegram kanallari orqali muntazam e’lon qilib borilayotgani ma’lum qilindi.
