O‘rmon yong‘inlari sabab JCH-2026 finali ko‘chirilishi mumkin
Kanadadagi yirik o‘rmon yong‘inlari oqibatida Shimoliy Amerikada havo sifati keskin yomonlashgan.
Kanadada davom etayotgan keng ko‘lamli o‘rmon yong‘inlari natijasida hosil bo‘lgan tutun AQSH va Kanadaning yirik shaharlarini egallab olgan. Havo sifatining keskin yomonlashuvi sabab Shimoliy Amerikadagi bir qator futbol uchrashuvlari qoldirilgan yoki o‘yin sharoitlari o‘zgartirilgan. Mutaxassislar bu vaziyat 2026-yilgi FIFA Jahon chempionati finaliga ham ta’sir qilishi mumkinligini ta’kidlamoqda.
Tutun eng ko‘p AQShning shimoli-sharqiy hududlari, jumladan Nyu-York, Nyu-Jersi, shuningdek Kanadaning Toronto shahrini qoplagan. Aynan shu hududlarda erkaklar va ayollar o‘rtasidagi professional futbol musobaqalari o‘tkaziladi. Havo sifati yomonlashgani sabab ayrim uchrashuvlar kechiktirilgan, boshqalarida esa qo‘shimcha suv ichish tanaffuslari joriy etilgan.
Sport shifokorlarining ta’kidlashicha, yong‘in tutuni tarkibidagi mayda zarrachalar sportchilarning nafas olish tizimi va yurak-qon tomir faoliyatiga salbiy ta’sir ko‘rsatishi mumkin. Ayniqsa yuqori jismoniy yuklama ostida bu xavf yanada ortadi. Shu sabab mutaxassislar zarurat tug‘ilganda mashg‘ulotlarni yopiq inshootlarga ko‘chirish yoki uchrashuvlarni boshqa vaqtga surishni tavsiya qilmoqda.
Jahon chempionati finali 20-iyul kuni AQShning Nyu-Jersi shtatidagi MetLife Stadiumda o‘tkazilishi rejalashtirilgan. Ushbu stadion ochiq osmon ostida joylashgani bois havo sifati bevosita uchrashuv o‘tkazilishiga ta’sir qilishi mumkin. Biroq meteorologlar hafta oxirida kuchli yomg‘ir va sovuq havo oqimining mamlakatga kirib kelishi kutilayotgani sabab finalga qadar tutun sezilarli darajada tarqalishini prognoz qilishmoqda.
Shunga qaramay, ekologlar va sog‘liqni saqlash mutaxassislari iqlim o‘zgarishi oqibatida o‘rmon yong‘inlari tobora tez-tez kuzatilayotganini, bu esa kelajakdagi yirik sport musobaqalarini tashkil etishda yangi muammolarni yuzaga keltirayotganini qayd etmoqda. Ularning fikricha, FIFA va boshqa sport tashkilotlari ob-havo hamda havo sifati bilan bog‘liq favqulodda holatlar uchun yanada qat’iy protokollar ishlab chiqishi zarur.
