O‘zbekistonda anomal issiq qachon pasayishi ma’lum qilindi
Prognozlarga ko‘ra, havo harorati 6–9 darajaga pasayadi.
O‘zbekistonda kuzatilayotgan anomal issiq ob-havo 21-iyuldan boshlab bosqichma-bosqich pasaya boshlaydi. Bu haqda “O‘zgidromet” ma’lum qildi.
Prognozga ko‘ra, 18–20-iyul kunlari respublika bo‘ylab jazirama saqlanib qoladi. Kunduz kunlari havo harorati 42–45 darajagacha, janubiy va cho‘l hududlarda esa 46–48 darajagacha ko‘tarilishi kutilmoqda.
Shamol tezligi 9–14 metr/sekundni tashkil etadi, ayrim hududlarda 15–18 metr/sekundgacha, shimol, janub va cho‘l hududlarida esa ba’zan 20–22 metr/sekundgacha kuchayishi hamda chang-to‘zon kuzatilishi mumkin.
Ma’lum qilinishicha, 20-iyul kuni respublikaning aksariyat hududlarida ekstremal issiq ob-havo saqlanib qoladi. Faqat shimoli-g‘arbiy hududlarda harorat pasaya boshlaydi.
21-iyuldan boshlab esa mamlakatning barcha hududlarida issiq chekinishi kutilmoqda. Prognozlarga ko‘ra, havo harorati 6–9 darajaga pasayadi.
Toshkent shahrida juma kuni havo harorati 41–43 daraja, shanba va yakshanba kunlari esa 43–45 darajagacha ko‘tariladi. Kechalari harorat 25–28 daraja atrofida bo‘lishi prognoz qilinmoqda.
