Toshkentda transformator yonib ketdi
Hozirda tuman elektr tarmoqlari tomonidan ta’mirlash ishlari olib borilmoqda.
Toshkent shahrining Mirzo Ulug‘bek tumanida transformatorlarda yuzaga kelgan yong‘in qisqa vaqt ichida bartaraf etildi. Bu haqda Favqulodda vaziyatlar boshqarmasi xabar berdi.
Ma’lum qilinishicha, 17-iyul kuni soat 09:10 da Mirzo Ulug‘bek tumani Olimlar ko‘chasida joylashgan transformator yonayotgani haqida Toshkent shahar Favqulodda vaziyatlar boshqarmasiga xabar kelib tushgan.
Shunga ko‘ra, yong‘in-qutqaruv ekipajlari voqea joyiga zudlik bilan yetib borib, yong‘inni soat 09:28 da to‘liq bartaraf etgan.
Dastlabki ma’lumotlarga ko‘ra, hodisa oqibatida transformator yonib zarar ko‘rgan. Ayni paytda tuman elektr tarmoqlari mutaxassislari tomonidan ta’mirlash ishlari olib borilmoqda.
Hodisa oqibatida jabrlanganlar yo‘q.
