Tramp Xitoyni saylovlarga aralashganlikda aybladi
Ammo u 2020-yilgi AQSH prezidentlik saylovlariga aralashganlik da’volarini tasdiqlovchi aniq dalillarni taqdim etmagan.
AQSH prezidenti Donald Tramp Xitoyni 2020-yilgi prezidentlik saylovlariga aralashganlikda ayblab, Pekin “AQSH saylovlari tarixidagi eng yirik ma’lumotlar buzilishi”ni amalga oshirganini da’vo qildi. U bu haqda Oq uyda qilgan murojaati davomida ma’lum qildi.
Trampning aytishicha, maxfiylikdan chiqarilgan razvedka hujjatlarida Xitoy AQSHdagi millionlab saylovchilarga oid ma’lumotlarni qo‘lga kiritgani qayd etilgan. Prezident ushbu ma’lumotlar 2020-yilgi saylov natijalariga ta’sir ko‘rsatgan bo‘lishi mumkinligini bildirgan, biroq o‘z bayonotini tasdiqlovchi aniq dalillarni ommaga taqdim etmadi.
Reuters qayd etishicha, Trampning yangi ayblovlari AQSH razvedka hamjamiyatining avvalgi xulosalariga zid. Ilgari e’lon qilingan rasmiy baholashlarda Xitoy AQSH siyosiy jarayonlariga ta’sir o‘tkazishga uringani haqida ma’lumotlar mavjud bo‘lsa-da, 2020-yilgi prezidentlik saylovi natijalarini o‘zgartirganiga oid dalillar topilmagan. Shuningdek, ko‘plab sud qarorlari, qayta ovoz sanash jarayonlari va mustaqil tekshiruvlar Jo Baydenning g‘alabasini tasdiqlagan hamda keng ko‘lamli saylov firibgarligi aniqlanmaganini ko‘rsatgan.
Tramp o‘z murojaatida saylov xavfsizligini kuchaytirish zarurligini ham ta’kidlab, shaxsni tasdiqlovchi hujjatlar bilan ovoz berish talablarini kuchaytirishni yana bir bor qo‘llab-quvvatlagan. Uning ma’muriyati saylov tizimidagi zaifliklar bo‘yicha ayrim razvedka materiallarini maxfiylikdan chiqarganini ham ma’lum qilgan.
Tahlilchilarning fikricha, Trampning Xitoyga nisbatan yangi ayblovlari Vashington va Pekin o‘rtasidagi munosabatlarga salbiy ta’sir ko‘rsatishi mumkin. Reuters manbalariga ko‘ra, ikki davlat rahbarlari o‘rtasida yaqin oylar ichida rejalashtirilgan uchrashuv oldidan bunday bayonotlar diplomatik muhitni murakkablashtirishi ehtimoldan xoli emas.
