Yarim yilda elektr va gaz ta’minoti bo‘yicha 39 mingdan ortiq murojaat kelib tushdi

Prezident Shavkat Mirziyoyevga yoqilg‘i-energetika sohasidagi murojaatlar tahlili yuzasidan axborot taqdim etildi.

 

Unda qayd etilishicha, 2026-yilning birinchi yarmida aholidan elektr va gaz ta’minoti masalalari bo‘yicha 39 ming 220 ta murojaat kelib tushgan. Bu ko‘rsatkich o‘tgan yilning shu davriga nisbatan 26,1 foizga kamaygan bo‘lsa-da, tizimdagi muammolar saqlanib qolmoqda.

 

Murojaatlarning qariyb yarmi tabiiy va suyultirilgan gaz ta’minoti, 38,3 foizi esa elektr ta’minoti bilan bog‘liq bo‘lgan.

 

Fuqarolar asosan elektr energiyasining tez-tez uzilishi, eskirgan elektr tarmoqlari va transformatorlarni ta’mirlash, tabiiy gaz bosimining pastligi hamda gaz ballonlarini o‘z vaqtida to‘ldirish va yetkazib berish masalalari yuzasidan murojaat qilgan.

 

Yig‘ilishda har bir murojaat alohida shikoyat emas, balki muayyan hududdagi tizimli muammolarni ko‘rsatuvchi signal sifatida baholanishi kerakligi ta’kidlandi.

 

Prezident mas’ullarga kuz-qish mavsumi boshlanguniga qadar aholi tomonidan takroran murojaat qilinayotgan mahallalarni o‘rganish, elektr va gaz tarmoqlarining texnik holatini tekshirish hamda aniqlangan kamchiliklarni bartaraf etish bo‘yicha alohida chora-tadbirlar ishlab chiqishni topshirdi.

 

Shuningdek, elektr uzilishlari ko‘p kuzatilayotgan hududlarda tarmoqlar va transformatorlarni ta’mirlash, avariya brigadalarini doimiy shay holatda saqlash, gaz bosimi past bo‘lgan hududlarda esa ta’minotni barqarorlashtirish hamda gaz ballonlarini yetkazib berish grafiklariga qat’iy rioya etish vazifalari belgilandi.

 

Davlat rahbari mas’ullarga sovuq mavsum boshlanishidan oldin murojaatlarda ko‘tarilgan asosiy muammolarni bartaraf etish hamda aholi va ijtimoiy obyektlarni elektr energiyasi, gaz va boshqa yoqilg‘i resurslari bilan uzluksiz ta’minlash bo‘yicha ko‘rsatmalar berdi.