Anomal issiq fonida elektr iste’moli rekordi yangilandi
Elektr energiyasi iste’moli va ishlab chiqarish hajmi avvalgi rekordlardan ham yuqori bo‘ldi.
O‘zbekiston yagona energetika tizimida 2026-yil 17-iyul kuni elektr energiyasi iste’moli va ishlab chiqarish bo‘yicha navbatdagi rekord ko‘rsatkichlar qayd etildi.
Energetika vazirligi ma’lumotiga ko‘ra, sutkalik elektr energiyasi iste’moli 293,4 mln kVt·soatni tashkil etib, o‘tgan yil yozgi mavsumidagi eng yuqori ko‘rsatkichdan 20,8 mln kVt·soatga yoki 7,6 foizga yuqori bo‘lgan.
Shuningdek, sutkalik elektr energiyasi ishlab chiqarish hajmi 296,1 mln kVt·soatni tashkil etib, 16-iyulda qayd etilgan rekorddan 0,7 mln kVt·soatga (0,24 foizga) oshgan.
Kichik quvvatli quyosh fotoelektr stansiyalari ishlab chiqargan energiya bilan birgalikda 17-iyul kuni mamlakat bo‘yicha jami 305 mln kVt·soat elektr energiyasi ishlab chiqarildi. Bu avvalgi kun ko‘rsatkichidan 9,6 mln kVt·soatga yoki 3,2 foizga ko‘pdir.
Qayd etilishicha, dispetcherlik xizmatlari elektr tarmoqlaridagi yuklama hamda transformator va boshqa uskunalarning texnik holatini real vaqt rejimida doimiy nazorat qilmoqda. Zarurat tug‘ilganda yuklamani qayta taqsimlash va boshqa tezkor choralar ko‘rilib, texnologik nosozliklar hamda yirik uzilishlarning oldi olinmoqda.
