Belgiya bosib olingan Falastin yerlarida ishlab chiqarilgan Isroil mahsulotlarini import qilishni taqiqladi

Belgiya federal hukumati bosib olingan Falastin hududlaridagi Isroil manzilgohlarida ishlab chiqarilgan mahsulotlarni mamlakatga olib kirishni taqiqlashni ma’qulladi. Bu haqda Al Jazeera xabar berdi.

 

Qayd etilishicha, qaror hukumatning yozgi ta’til oldidan o‘tkazilgan so‘nggi Vazirlar Mahkamasi yig‘ilishida qabul qilingan. Mazkur taqiq Isroilning G‘azodagi harbiy amaliyotlari fonida Belgiya hukumati o‘tgan yili bergan va’dasining bajarilishi sifatida baholanmoqda.

 

Belgiya tashqi ishlar vaziri Maksim Prevo avvalroq Bryusselda o‘tgan yig‘ilishda Yevropa Ittifoqi bo‘ylab ham shunday taqiq joriy etishga chaqirgan. Biroq a’zo davlatlar bu masalada hozircha yagona qarorga kela olmagan.

 

Joriy yilda Global Echo Litigation Center tomonidan o‘tkazilgan tergov davomida Isroildan Yevropaga eksport qilingan 30 mingdan ortiq hujjat tahlil qilingan. Unda G‘arbiy Sohil va Golan tepaliklaridagi Isroil manzilgohlarida yetishtirilgan mahsulotlar ko‘pincha Isroilda ishlab chiqarilgan mahsulot sifatida rasmiylashtirilgani aniqlangan.

 

Belgiya bu borada mustaqil choralar ko‘rgan Yevropa davlatlari qatoriga qo‘shildi. Avvalroq Ispaniya, Niderlandiya, Sloveniya va Irlandiya ham Isroil manzilgohlarida ishlab chiqarilgan mahsulotlarga nisbatan cheklovlar joriy etgan edi.

 

Sobiq Yevropa amaldorlari esa Yevropa Ittifoqini ushbu masalada umumiy taqiq joriy etishga chaqirib, alohida davlatlar qabul qilayotgan qarorlar yagona ittifoq siyosatisiz cheklangan samara berishini ta’kidlagan.