Energetika tizimida bitiruvchilarni ishga qabul qilish boshlandi
Mehnat yarmarkasida 100 dan ortiq bitiruvchi ish beruvchilar bilan uchrashdi, 80 nafardan ortig‘i suhbat bosqichiga yo‘llanma oldi.
Davlat rahbarining 30-iyun kuni bergan topshirig‘i ijrosi doirasida Energetika vazirligi tashabbusi bilan Toshkent davlat texnika universitetida oliy ta’lim muassasalari bitiruvchilari uchun ochiq muloqot va bo‘sh ish o‘rinlari yarmarkasi tashkil etildi.
Tadbirda Energetika vaziri Jo‘rabek Mirzamahmudov, energetika tizimidagi yirik korxona va tashkilotlar rahbarlari hamda Toshkent davlat texnika universiteti, I.M. Gubkin nomidagi Neft va gaz universiteti, "TIQXMMI" Milliy tadqiqot universiteti va I.D. Mendeleyev nomidagi Kimyo-texnologiya universiteti rahbarlari ishtirok etdi.
Ochiq muloqot davomida bitiruvchilarga energetika korxonalaridagi bo‘sh ish o‘rinlari, mehnat sharoitlari va kasbiy rivojlanish imkoniyatlari haqida batafsil ma’lumot berildi.
Shuningdek, tadbirda "100 nafar yosh energetik" loyihasiga start berilgani e’lon qilindi. Mazkur loyiha doirasida istiqbolli yosh mutaxassislar saralanib, nufuzli xorijiy kompaniyalarda stajirovka o‘tashi hamda kelgusida rahbar kadrlar zaxirasiga kiritilishi rejalashtirilgan.
Tadbir yakunida Energetika vazirligi va oliy ta’lim muassasalari o‘rtasida hamkorlik memorandumlari imzolandi.
Ma’lum qilinishicha, yarmarka davomida 100 nafardan ortiq bitiruvchi ish beruvchilar bilan uchrashgan, 80 nafardan ortig‘i esa mavjud bo‘sh ish o‘rinlari bo‘yicha dastlabki suhbat bosqichiga taklif etilgan.
