Meksikada 7,3 magnitudali zilzila sodir bo‘ldi
Zilziladan keyin Tinch okeani qirg‘oqlarida sunami xavfi bo‘yicha ogohlantirish e’lon qilingan.
Meksikaning janubiy qirg‘oqlari yaqinida, Tehuantepek ko‘rfazi hududida 7,3 magnitudali kuchli zilzila sodir bo‘ldi. Bu haqda AQSH Geologik xizmati (USGS) ma’lum qildi.
Ma’lumotlarga ko‘ra, zilzila epitsentri Puerto Madero port shahri yaqinida, Aquiles-Serdan hududidan taxminan 48–58 kilometr janubi-g‘arbda joylashgan. Yer silkinishlari o‘chog‘i 15–18 kilometr chuqurlikda qayd etilgan.
Asosiy zilziladan so‘ng hududda 10 dan ortiq takroriy silkinishlar kuzatildi. Ularning ayrimlari 5,1 va 6,0 magnitudaga yetgan.
Zilziladan keyin Meksikaning Tinch okeani qirg‘oqlari hamda qo‘shni Gvatemala hududlari uchun sunami xavfi bo‘yicha ogohlantirish e’lon qilingan. Bir necha soatdan so‘ng ogohlantirish bekor qilingan.
Meksika prezidenti Klaudiya Sheynbaumning ma’lum qilishicha, Chiapas va Tabasko shtatlari rahbarlari bilan bog‘lanilgan hamda hozircha qurbonlar yoki jiddiy vayronagarchiliklar haqida ma’lumot kelib tushmagan. Ayni paytda mahalliy va federal xizmatlar zilzila oqibatlarini o‘rganishda davom etmoqda.
