Mujtabo Xomanaiyning ilk xalqaro muloqoti Putin bilan bo‘lishi mumkin — TASS
Eron manbasi Eronning oliy rahbari va Rossiya prezidenti o‘rtasida yaqin vaqt ichida telefon suhbati yoki uchrashuv o‘tkazilishi ehtimolini bildirdi.
Eronning yangi oliy rahbari Mujtabo Xomanaiyning birinchi xalqaro aloqasi Rossiya prezidenti Vladimir Putin bilan telefon orqali muloqot yoki shaxsiy uchrashuv bo‘lishi mumkin. Bu haqda TASS agentligi eronlik manbaga tayanib xabar berdi.
Manba Rossiyani Eronning yaqin hamkorlaridan biri, Vladimir Putinni esa Islom Respublikasining yaqin do‘sti sifatida ta’riflagan.
“Ehtimol, birinchi telefon qo‘ng‘irog‘i va birinchi uchrashuv Prezident Vladimir Putin bilan bo‘ladi”, — degan agentlik suhbatdoshi.
Shuningdek, uning so‘zlariga ko‘ra, mamlakatdagi harbiy vaziyat va xavfsizlik bilan bog‘liq omillar sabab Mujtabo Xomanaiy hozircha omma oldida ko‘rinmayapti.
Avvalroq ayrim nashrlarda Mujtabo Xomanaiy sog‘lig‘i bilan bog‘liq turli xabarlar tarqalgan edi. Biroq Eronning Rossiyadagi elchisi Kozim Jaloliy bu ma’lumotlarni rad etib, Xomanaiy tirik va sog‘lom ekanini bildirgan.
