Pokiston va Quvayt mudofaa hamkorligini kengaytirish bo‘yicha muzokara o‘tkazmoqda

Pokiston va Quvayt mudofaa sohasidagi hamkorlikni kengaytirish bo‘yicha muzokaralar olib bormoqda. Reuters agentligining besh nafar xabardor manbaga tayanib xabar berishicha, muzokaralar hali dastlabki bosqichda bo‘lib, yakuniy kelishuvga erishilishi mintaqadagi geosiyosiy vaziyatga ham bog‘liq.

 
Manbalarga ko‘ra, Quvayt 2023-yildan buyon amal qilib kelayotgan amaldagi mudofaa hamkorligi kelishuvidan ham kengroq bitim tuzishni istamoqda. Yangi hujjat Pokiston bilan Saudiya Arabistoni o‘rtasida avval imzolangan strategik mudofaa bitimiga o‘xshash bo‘lishi, unda Pokiston harbiy xizmatchilari, qiruvchi samolyotlar, uchuvchisiz apparatlar, havo mudofaasi tizimlari va boshqa harbiy vositalarning joylashtirilishi nazarda tutilishi mumkin. Biroq Pokiston rasmiylari hozircha jangovar qo‘shinlarni Quvaytga yuborish masalasi ko‘rib chiqilmayotganini bildirgan.

 
Reuters manbalariga ko‘ra, Islomobod mazkur hamkorlik evaziga Quvayt bilan energetika sohasidagi aloqalarni mustahkamlashni maqsad qilgan. Xususan, neft mahsulotlarini saqlash infratuzilmasini rivojlantirish hamda Quvayt investitsiyalarini jalb etish masalalari muzokaralarning muhim qismi hisoblanadi.

 
Quvayt Pokistonni uzoq yillardan buyon ishonchli harbiy hamkor sifatida ko‘rib keladi. Ikki davlat o‘rtasidagi harbiy aloqalar o‘nlab yillardan buyon davom etib, Pokiston harbiy mutaxassislari Quvayt armiyasini tayyorlash va maslahat berish ishlarida ishtirok etib kelmoqda. Shuningdek, Pokiston harbiylari avval ham Fors ko‘rfazi davlatlarida xizmat qilgan.

 
Manbalarga ko‘ra, Pokiston, Saudiya Arabistoni va Turkiya o‘rtasida ham mintaqaviy xavfsizlik bo‘yicha yangi tashabbuslar muhokama qilinmoqda. Bahrayn va Iordaniya ham Islomobod bilan shunga o‘xshash mudofaa hamkorligini yo‘lga qo‘yishga qiziqish bildirgan. Biroq hozircha Pokiston va Quvayt o‘rtasidagi muzokaralar yakuniga yetmagan va tomonlar rasmiy kelishuv imzolash bo‘yicha qaror qabul qilmagan.