Qariyb 1800 nafar tadbirkorning elektr energiyasi bo‘yicha imtiyozi tiklandi
To‘qimachilik va tikuv-trikotaj korxonalaridan elektr energiyasi uchun oldindan to‘lov undirish amaliyoti to‘xtatildi.
Biznes-ombudsman Namangan shahridagi "M.G." MCHJ murojaati asosida to‘qimachilik va tikuv-trikotaj sohasida faoliyat yuritayotgan tadbirkorlik subyektlariga qonunchilikda belgilangan imtiyozlarning qo‘llanilishi yuzasidan respublika miqyosida o‘rganish o‘tkazdi.
Ma’lum qilinishicha, Prezidentning 2023-yil 10-yanvardagi PF–2-son Farmoniga muvofiq, mazkur sohada faoliyat yurituvchi tadbirkorlar uchun elektr energiyasi iste’moli bo‘yicha bir oylik oldindan to‘lov talabi bekor qilingan.
Biroq o‘rganish davomida respublikaning ko‘plab hududlaridagi korxonalarga nisbatan ushbu imtiyoz amalda qo‘llanilmagani, ulardan elektr energiyasi uchun oldindan to‘lov undirish amaliyoti davom etayotgani aniqlangan.
Shundan so‘ng Biznes-ombudsman devoni tomonidan tadbirkorlarning huquq va qonuniy manfaatlarini tiklash hamda noqonuniy undiruvlarni bekor qilish yuzasidan tegishli xulosa kiritilgan.
Natijada 1 798 ta tadbirkorlik subyektiga nisbatan qonuniy imtiyozlar qayta qo‘llanildi. Shuningdek, 84,7 milliard so‘m miqdoridagi asossiz hisoblangan mablag‘ hisobdan chiqarildi.
Bundan tashqari, to‘qimachilik va tikuv-trikotaj korxonalaridan elektr energiyasi uchun bir oylik oldindan to‘lov undirish amaliyoti to‘xtatildi.
O‘rganish yakunlariga ko‘ra, tadbirkorlarga belgilangan imtiyozlarni qo‘llamagan 109 nafar mansabdor shaxsga nisbatan Ma’muriy javobgarlik to‘g‘risidagi kodeksning 241⁶-moddasi asosida ma’muriy bayonnomalar rasmiylashtirildi va ularning javobgarligi masalasi ko‘rib chiqildi.
