Tramp Kanadaga yangi bojlar bilan tahdid qildi

 
AQSh prezidenti Donald Tramp Kanadadagi o‘rmon yong‘inlari oqibatida yuzaga kelayotgan tutun AQShning ko‘plab shtatlariga tarqalayotgani uchun Kanada mahsulotlariga nisbatan bojlarni yanada oshirish bilan tahdid qildi. U bu haqda o‘zining Truth Social ijtimoiy tarmog‘idagi sahifasida bayonot berdi.

 
Trampning ta'kidlashicha, Kanadadan kirib kelayotgan tutun AQSh aholisi salomatligi va iqtisodiyotiga milliardlab dollar zarar yetkazmoqda. U Ottavani o‘rmonlarni yetarli darajada boshqarmayotganlikda ayblab, vaziyatni "beparvolik" deb baholadi. Prezidentning aytishicha, ushbu zarar xarajatlari Kanada mahsulotlariga nisbatan amalda qo‘llanayotgan bojlar miqdoriga qo‘shilishi kerak.

 
So‘nggi haftalarda Kanadaning, ayniqsa Ontario provinsiyasidagi yirik o‘rmon yong‘inlari natijasida hosil bo‘lgan tutun AQShning O‘rta G‘arb va Shimoli-sharqiy shtatlarigacha yetib borgan. Chikago, Detroyt, Nyu-York va boshqa yirik shaharlarda havo sifati keskin yomonlashib, aholi uchun sog‘liq bo‘yicha ogohlantirishlar e'lon qilingan.

 
Biroq, Kanada hukumati Trampning ayblovlarini rad etdi. Favqulodda vaziyatlar vaziri Eleanor Olszewski mamlakat o‘rmonlarni muhofaza qilish va yong‘inlarga qarshi kurashga 12 milliard Kanada dollaridan ortiq mablag‘ yo‘naltirganini bildirib, AQSh va Kanada o‘rtasidagi hamkorlik davom etayotganini ta’kidlagan. Ontario hukumati esa yong‘inlarga qarshi kurashish imkoniyatlarini kuchaytirish maqsadida 11 ta yangi samolyot xarid qilinishini e'lon qilgan.

 
Mutaxassislarning fikricha, Kanada va AQSHda so‘nggi yillarda o‘rmon yong‘inlarining ko‘payishiga iqlim o‘zgarishi, yuqori harorat va qurg‘oqchilik asosiy omillardan biri bo‘lmoqda. Joriy yilda Ontario provinsiyasida 650 ming akrdan ortiq hudud yonib ketgan, minglab odamlar xavfsiz hududlarga evakuatsiya qilingan. Shu bilan birga, AQSHning o‘zida ham 2026-yil boshidan buyon 1,5 million gektardan ortiq maydon o‘rmon yong‘inlari oqibatida zarar ko‘rgan.