AQSHda aka-uka Teytlar Buyuk Britaniya so‘rovi bilan hibsga olindi

AQSH marshallari ijtimoiy tarmoqlardagi faoliyati bilan tanilgan aka-uka Endryu va Tristan Teytni Buyuk Britaniyaning ekstraditsiya so‘rovi asosida Mayamida hibsga oldi. Bu haqda CNN xabar berdi.

 

Ma’lum qilinishicha, Buyuk Britaniya tergovchilari 2010–2017-yillar oralig‘ida Sharqiy Angliyada sodir etilgani aytilayotgan jinsiy jinoyatlar yuzasidan yetti nafar jabrlanuvchining murojaatini o‘rgangan. Endryu Teytga nisbatan zo‘rlash, odam savdosi, voyaga yetmaganlarga oid nomaqbul tasvirlarni saqlash va tan jarohati yetkazish kabi 42 ta ayblov qo‘yilgan. Tristan Teyt esa zo‘rlash, jinsiy tajovuz va odam savdosi bilan bog‘liq 17 ta ayblovga duch kelmoqda.

 

AQSH Adliya vazirligi aka-ukalar ekstraditsiya jarayonlari doirasida xalqaro shartnomalar va huquqni muhofaza qilish bo‘yicha amaldagi kelishuvlarga muvofiq hibsga olinganini tasdiqladi. Ular kelasi hafta Mayamidagi federal sud oldiga chiqarilishi kutilmoqda.

 

Teytlarning advokati Jozef Makbrayd mijozlari aybsiz ekanini bildirib, Buyuk Britaniya va Ruminiya o‘rtasida Ruminiyadagi sud ishlari yakunlanmaguncha ekstraditsiya talab qilinmasligi bo‘yicha kelishuv mavjudligini ta’kidladi. Uning so‘zlariga ko‘ra, Ruminiyadagi sud jarayonlari hali ham davom etmoqda.

 

Ruminiya prokuraturasi ham avvalroq aka-ukalarni ayollarni Ruminiya, Buyuk Britaniya va AQSH bo‘ylab odam savdosi yo‘li bilan olib o‘tganlik hamda jinsiy ekspluatatsiya qilganlikda ayblagan edi. Aka-ukalar ushbu ayblovlarni rad etib kelmoqda.

 

Endryu Teyt Buyuk Britaniyada yana bir fuqarolik da’vosi bo‘yicha ham javobgar hisoblanadi. To‘rt nafar ayol uni zo‘rlashda ayblab sudga murojaat qilgan. Teyt vakillari esa bu ayblovlarni ham qat’iyan inkor etmoqda.

 

Bedfordshir politsiyasi ma’lumotiga ko‘ra, yangi ayblovlar Bedfordshir va Hertfordshir hududlaridagi yana to‘rt nafar jabrlanuvchining ko‘rsatmalari hamda tergov davomida to‘plangan qo‘shimcha dalillar asosida ilgari surilgan.

 

AQSH va Buyuk Britaniya fuqaroligiga ega bo‘lgan aka-ukalar 2025-yil fevral oyida Ruminiya rasmiylari ularga qo‘yilgan safar cheklovlarini bekor qilganidan so‘ng Floridaga kelgan edi. Ularning Florida shtatiga kelishi ortidan shtat bosh prokuraturasi ham ular yuzasidan alohida tergov boshlagan.

 

2026-yilning 4-aprel kuni Endryu Teyt X ijtimoiy tarmog‘idagi sahifasida O‘zbekistonga tashrifi aks etgan videoni e’lon qilgan edi. Unda u Toshkent xalqaro aeroportida karnay-surnay sadolari ostida hamda zar chopon kiydirilgan holda kutib olinayotgani tasvirlangan.

 

Mazkur video ijtimoiy tarmoqlarning o‘zbek segmentida keng muhokamalarga sabab bo‘ldi. Xalqaro miqyosda og‘ir jinoyatlarda ayblanayotgan shaxsga bunday tantanali kutib olish marosimi tashkil etilgani tanqidlarga uchradi.