Toshkentda 58-Xalqaro kimyo olimpiadasi yakunlandi

19-iyun kuni Toshkent shahrida 58-Xalqaro kimyo olimpiadasining tantanali taqdirlash marosimi bo‘lib o‘tdi. Unda O‘zbekiston sharafini himoya qilgan to‘rt nafar o‘quvchining barchasi sovrindorlar qatoridan joy oldi. Bu haqda Zamon.uz muxbiri xabar berdi.

Yakuniy natijalarga ko‘ra, Rayhona Tuymurodova oltin medalni qo‘lga kiritdi. Jasur Mustafoyev, Azizmuhammad Hafizov hamda Mirjalol Homidjonov esa kumush medal bilan taqdirlandi.

O‘zbekiston tarixda ilk bor mazkur nufuzli xalqaro fan olimpiadasiga mezbonlik qildi. Musobaqada dunyoning 90 dan ortiq davlatidan iqtidorli o‘quvchilar ishtirok etib, nazariy va amaliy bosqichlarda o‘z bilimlarini sinovdan o‘tkazdi.

Xalqaro kimyo olimpiadasi dunyodagi eng nufuzli fan musobaqalaridan biri hisoblanadi. Unda har bir mamlakatdan to‘rt nafargacha o‘quvchi qatnashadi. Ishtirokchilar besh soatlik nazariy hamda besh soatlik laboratoriya-amaliy imtihonlarda murakkab kimyoviy masalalarni yechish bo‘yicha bellashadi.

Ma’lumot uchun, Prezidentning 2024-yil 30-sentabrdagi tegishli qaroriga muvofiq, nufuzli xalqaro fan olimpiadalarida medal qo‘lga kiritgan o‘zbekistonlik ishtirokchilar pul mukofoti bilan taqdirlanadi. Mazkur tartibga ko‘ra, oltin medal sohibiga 1 milliard 30 million so‘m, kumush medal sohibiga 618 million so‘m, bronza medal sohibiga esa 412 million so‘m mukofot beriladi.

Shuningdek, oltin medal sovrindorining ustoziga 185,4 million so‘m, kumush medal sovrindorining ustoziga 103 million so‘m, bronza medal sovrindorining ustoziga esa 61,8 million so‘m pul mukofoti to‘lanadi.

O‘zbekiston terma jamoasining natijalaridan kelib chiqib, o‘quvchilar uchun ajratiladigan jami mukofot puli 2 milliard 884 million so‘mni tashkil etadi. Ularni tayyorlagan ustozlarga esa jami 494,4 million so‘m miqdorida mukofot beriladi. Bundan tashqari, g‘oliblarni xalqaro olimpiadaga tayyorlagan o‘qituvchilarning malaka toifasi bir pog‘ona oshirilishi belgilangan.